Shillong, Naiwieng 9 : U Myntri Rangbah ka jylla u Conrad K Sangma u la ong mynta ka sngi ba ka jingpynkhreh nadong shadong hapdeng ka sorkar bad ka seng HNLC na ka bynta ban sdang ka jingkren ïasuk ka la ïaid shakhmat bad shen ruh kan sdang noh ka jingïakren ïasuk kaba pura.
“ Ka jingpynkhreh ka la ïaid bad ka sorkar ka shim khia halor kane ka kam. Ki jingïakren ia kynduh ki la sdang hi bad ngi kyrmen ba ki jingïakren iasuk ba pura kan sdang noh shen hapdeng ki ksiang ka seng HNLC bad ksiang ka sorkar pdeng bad sorkar jylla bad shen kin sa ïashong biang halor kane ka kam”.
U la ong shuh shuh “Ka Ministry of Home Affairs ruh ka shim khia ïa kane ka kam khamtam ba da u Mytnri Kam Pohïing ka ri hi u Amit Shah u shim ban bud dien ïakane ka jingkren ïasuk namar u ruh u kwah ba kane ka jingkren ïasuk kan poi beit sha ka jingseisoh bad jingïasngewthuh jingmut lang”
“ Ka long kaba eh ïa nga ban kren halor kane ka kam namar kam dei hi ruh ïa nga ban ong da kumne kumtai halor kane ka phang kaba kongsan hynrei tang kawei kaba nga tip ka long ba ki jingïakynduh jong ki nongmihkhmat na ka liang ka seng HNLC, sorkar jylla bad sorkar pdeng ki la ïaid shakhmat ban pynkhreh ïaka jingkren ïasuk” ong u myntri rangbah.
“Nga lah ruh ban ong ba kane ka jingïakren iasuk ka long kaba kyrpang kam dei kum kiwei kiwei ki prokram ka sorkar ne ki jingkhot ïakren ban shu ong to ngin iakren noh lashai la wan bad ïakren beit, hynrei halor kane ki don bun kiei kiei kiba hap ban pynkhreh, ki jingïamir jingmut, jingïa kdew ïa pyni. Kumta hap ban leh ha kata ka rukom ba baroh kin ïahun bad ïapdiang khnang ba ka jingïakren kan long da ka jingïasngewthuh jingmut lang bad kaba kam kongsan lei lei ka jingïoh jingshaniah halor kane ka kam” pynkut u Myntri Rangbah.
