Ki jingkular u MLA bad MDC ka Mawlai ki sahkut ha suiñ, mih ki paidbah ban maramot ïa ka surok ha Mawroh

Shillong, Risaw 22 : Ki Nongshong shnong jong kawei ka Dong ha Mawlai Mawroh, kila hap ban ïanoh synñiang pisa bad ïatynrong hi halade ïa ka jingkitkhlieh ban shna ïa ka surok bala jot rathai hapoh ka Dong namar ka daw ba ki jingkular na ki Nongmih khmat paidbah (MLA bad MDC) kila sahkut ha suiñ bad slem ban poi sha ki paidbah.
Kane ka Dong jong ka shnong Mawlai Mawroh ka dei ka Dong Pingwait-kaba la pynshna hi ïa ka surok dewbilat ba jrong kumba 200 meter eiei, da ka pisa kaba la ïanoh synñiang da ki nongshong shnong ka Dong, kynthup ïa ki ïing ba don kali ne thuk thuk bad ki bym don ruh kumjuh.
Kane ka surok dewbilat ha Dong Pingwait ka dei kaba la shna naduh u snem 2017-2018 lyngba ka skhim na ka Khasi Hills Autonomous District Council (KHADC). Kane ka surok kala jot bad bun satang ki thliew ki syar, kaba la buh ha ka jingeh ïa ki kali ne thuk thuk ba kin ïaid.
Kat kum ka jingïathuh u Secretary ka Shnong Bah PM Hynniewta, ula ïathuh ba Dong Pingwait dang shen kala lum ïa ka jingïalang hapoh ka Dong kaba ïakren halor kane ka surok bad kane ka jingïalang da kawei ka sur, kala shim ïa ka rai ban kyrpad ïa ki ïing kiba don kali ne ar shaka, ba kin ïasnohkti da kaba ïasynñiang pisa ban ïoh maramot ïa ka surok.
La kyrpad ruh wat ïa ki ïing ki bym don kali ne arshaka ba kin ïasnohkti lang ha kaban lah pynurlong ïa kane ka jingthmu.
U Bah Hynniewta ula ïathuh ba wat ki nongshong shnong jong ki dong ba marjan, kiba ju pyndonkam lang ïa kane ka surok ha ka leit ka wan, kila noh synñiang kylluid mysiem ban lah pynmih ia ka pisa kaba donkam.
“Kane ka jingïanoh synñiang jong ki nongshong shnong kiba don kali ne ki bym don kali ruh kumjuh, ka pyni ïa ka jingïatylli jong ka Shnong na ka bynta kane ka surok” ong u Secretary.
U Rangbah Dong ka Pingwait Bah Strong Pillar Mawtlang ula ïathuh ba ka Dong kala pyrshang ïa bun ki lad ki lynti ban ïoh ïa ka jingïarap na ka bynta ban ïoh shna pynbha ïa ka surok hynrei baroh ki jingpyrshang kim shym la poi shano shano ruh.
Haba kylli, ula ïathuh “Ngi la leit pynsngew ha u MLA bad MDC ka Mawlai bad bunsien kila ïa wan peit ïa kane ka surok hynrei kiei kiei baroh kila shu kut tang ha ki jingkular katba ka surok kala nang jot nang jot” ula ong.
U iathuh ba dei namar kane ka daw, ka Executive Committee jong ka Dong Pingwait kala lum ïa ka jingïalang ban ïamir jingmut kumno ban pynmih pisa bad da kawei ka jingmut la rai ban shu ïalum ïa u synñiang na ki Longïing ka Dong”.
U Bah Strong Pillar ula pynpaw ïa ka jingsngewnguh ïa ki nongshong shnong ka dong bad kiba marjan, kiba la noh ia u synñiang da ka jingkylluid mynsiem ban ïoh maramot ïa ka surok.
“Haduh mynta, ka Dong kala ïoh lum T.70,000 bad ka dang ap ïa kito ki ïing kiba don kali ba kin wan ban ai ïa u synñiang jong ki khnang ba yn lah pynïaid shakhmat ïa ka kam” ula ong.
U Rangbah Dong ula pynpaw, ba ka jingmaramot ïa kane ka surok kan shong eh ha ka jingïoh lum ïa u synñiang bad ka Dorbar kan hap ban pyntrei ïa ka surok katba dap katei ka pisa bad ban shu maramot noh tang ïa ki jaka kiba la sniew palat pud.