Ki jingïakhun laitluid ki nongïalam barim ki dei ban ai mynsiem ïa ki samla: Conrad

Shillong, Nailar14: U Myntri Rangbah ka jylla u Conrad K Sangma la ïashim bynta ban khmih ïa ka jingïaleh drama ne skit kaba dei shaphang ka jingim jong u Netaji Subhas Chandra Bose hapoh ka auditorium jong ka DGAR, Laitkor, Shillong, ba la pynlong da ka Rastriya Jagriti Sansthan bad ka P A Sangma Foundation.
Kane ka skit kadei kaba la ai kyrteng da ka ‘Rashtraputra’, la pynlehkai da ka theatre group of Netaji Institute of Skill Development, kaba nalor shi bynta na ka ki jingthmu ban ïarap ban kyntiew ïa ki sap ki phong ban pynbha ïa ka jinglong bad ka jingthmu ban long kiba aiti hapdeng ki samla, ki samla ki la pyndonkam ruh ïa ka rynsan kum ka dak ka jingïakhun ha ki jingim jong ki bad ki jingmut ruh na ka bynta ban long ki hero hapoh ka ri India.
U James P K Sangma, uba mihkhmat na ka P A Sangma Foundation u la ong ba ka P A Sangma Foundation ka kyrshan ïa kum kine ki jingsdang na ka daw ka jingsngew ieid ïa ka ri bad ka jingïalong kawei bad ban pynkhlaiñ ym tang na ka bynta ka jingkynmaw ïa ki riew aiti ïa ka ri hynrei da kaba sngewthuh ba kaei kaba ki ïeng ka long na ka bynta ka hok, ka jinglong babha bad ka India kaba laitluid ïa baroh.
Kane ka jingïalehkai ym tang ba ka long ka kam shakri sha ka jingim, ka jingpawnam bad ka jingnoh synniang u Netaji Subhas Chandra Bose hynrei kumjuh ruh ban pynneh pynsah ïa ka jinglong kongsan ka histori ka India, nangta ka jingai mynsiem ïa ki samla, nangta ban pynrung ïa ka mynsiem ieid ri.
U Myntri Rangbah, Conrad K Sangma, u la kynthoh da kaba ong ban ïoh sakhi ïa kane ka jingïalehkai ha shwa ka jingrakhe ïa ka 79th Independence Day ka India ka long shuh shuh kaba don jingmut. “Ki jingïalehkai kin lah ban wanrah ïa ka History jong ka jingim bad ka long kaba kyrpang ruh ïa ki samla ban ïoh shim bynta,” u la ong da kaba bynrap, “Aiba ba kane kan khring ïa ka jingai mynsiem bad ka mynsiem pynshlur jong u Subhas Chandra Bose”, ong u Myntri Rangbah hadien ba la dep peit ïa kane ka jingïalehkai.
U la ong ba ki khana jong ki nongïakhun laitluid ka ri bad ka jingim jong ki kadei ban ai ka jinghikai ïa ki samla mynta halor ka mynsiem aiti bad ka jingangnud na ka bynta ka ri.
“Ka jingïoh ïa ka jinglaitluid kadei kaba hap ïakhun shitom kumta ngi barabor ban kynmaw ïa ki jingaiti jong ki nongïalam jong ki haba mynta ngi la ïoh ban ïoh da ka jinglaitluid,” u la ong. Kham hadien u Myntri Rangbah u la pynkupburom ïa ki nongak ne actor kiba shim bynta ha kane ka jingïalehkai.