Shillong, Risaw 11: Ka rukom ai jingsumar jong ka Meghalaya ka la ïoh ïa ka jingïaroh ha ka ri baroh kawei, da kaba ïoh ïa ka kyrdan kaba ar ha kylleng ka ri India na ka bynta ka jingtreikam kaba bha hapoh ka National Programme for Palliative Care (NPPC), ka Tnad ka koit ka khiah, Sorkar India.
Ïa kane ka jingithuh la ai ha ka jingrakhe ïa ka World Hospice and Palliative Care Day 2025, kaba la pynlong ha Bagchi – Karunashraya Palliative Care Centre ha Bhubaneswar, Odisha mynta ka sngi.
Ka jingïaroh ka long kum ka jingithuh ïa ki sienjam ba heh jong ka jylla bad ki rukom treikam ba bha tam ha kaba ai ïa ka jingsumar ba bha.
Ka Tnad ka koit ka khiah jong ka jylla Meghalaya ka la ong ba kane ka jingithuh jong ka ri ka long ka jingpynshisha ïa ka jingkut jingmut jong ka jylla ban sumar ïa ki nongpang da kaba peit bniah ïa ka bha ka miat jong ki nongpang.
Ka Tnad ka la kdew ba kane ka jingjop ka pyni ïa ka jingpyntreikam kaba paka jong ka Meghalaya ïa ki rukom ai jingshakri kiba thymmai kiba pynneh ïa ka jingsuk, ka burom bad ka jingim ba bha na ka bynta ki nongpang kiba don ïa ki jingpang kiba shyrkhei. Ka jingtreilang jong ki ka la ïarap ïa ka kynhun jong ka jylla ban pyni ïa ki jingjop jong ka Meghalaya hakhmat ka Central Division bad ka Tnad ka Koit ka Khiah jong ka Sorkar Pdeng.
Kane ka mawjam ka dei ka jingmih na ka jingtreilang kaba khlem shongthait da ki kynhun ka koit ka khiah jong ki district, ki nongtrei ka koit ka khiah, bad ki nongtrei ka koit ka khiah ha ka imlang sahlang ha kylleng ka jylla Meghalaya. Ka jingaiti lang jong ka ka la ïarap ban buh ïa ka jylla kum ka nuksa ïa ka ri na ka bynta ka jingai jingsumar kaba seisoh bad kaba don ka jingsngewlem ïa ki nongpang.
