Ki jaka Sorkar ha Shillong ki dang dei ka nongkynti jong ka Kur Nongkhlaw

Shillong, Nailur, 20: Hadien ba ka mih ka jingïatai ha ki rynsan Social Media bad ki ïew ki hat ïa ka pakit ki jaka ki puta bad ka hok longtrai ïa ka khyndew ka shyiap da ki Kur bad ki Hima, ka sorkar bad ka District Council na ka liang na ka liang u Mawphor u la pyrshang ban ïakren bad ki katto katne ngut ki khraw pyrkhat bad ki riew shemphang kiba la jngi kham jylliew halor ka jaka ha ka jylla bad kumno ki don ki Revenue Land ne jaka sorkar ha Nongbah Shillong.
Ki jaka sorkar ha Nongbah Shillong kaba ka jingïar kam duna ïa ka 1000 akar ki dei ki jaka kiba la shim wai da ka sorkar phareng lyngba ka Agreement kaba ki la ïasoi hapdeng ka Kur Nongkhlaw bad ka Syiem Bilat ha ka 10 tarik Nohprah ha u snem 1833 bad ka dor ba 50 tyngka shisnem bad kane ka snem wai ka kut noh pat ha u snem 1962 bad kat haduh mynta ym pat don satia ka jing pynthymmai biang ïa kane ka soskular ba la soi ong kine ki riew shemphang bym kwah pynpaw kyrteng
La ong ruh ba hadien ba ka ri India ka la ïoh ïa ka jinglailuid ha u snem 1947 kine ki jaka kiba la soi hapdeng ka Syiem Bilat bad ka Kur Nongkhlaw la bteng ban siew bai wai da ka sorkar Assam bad Meghalaya ynda la ïoh jylla la ka jong. Shuh shuh la ong ba watla ka snem ai wai ka la kut noh ha u snem 1962 hynrei na ka liang ka sorkar ka la bteng ban siew baiwai tad haduh u 1977 bad hadien kata ka sorkar kam siew shuh ïa ka baiwai namar kam tip ban siew shano na ka jingmih ki daw ïing ha ka kur Nongkhlaw.
“Kine ki jaka ba ngi ong ki jaka sorkar kim dei ka nongkynti ka sorkar bad ka sorkar ruh ka sngewthuh bha ïa kane” ïathuh uwei na ki riewshemphang bad bynrap ruh, “balei nga nud ban ong ïa kane namar ki jaka sorkar baroh ha Shillong ka sorkar kam lah ban die duh bad lada ka ai jaka sha kino kino ki tnad sorkar ne ki seng ne kynhun ka shu ai wai beit namar ka sngewthuh ba ka ruh ka shu shim wai”.
Shuh shuh une u riewshemphang u la ïathuh ba kat kum ka map bad ki kot bad ki dulir kine ki jaka ba kam ka sorkar ki dei baroh ha ka jaka ba long trai da ka kur Nongkhlaw bad kine ki jaka kat kum ka map ka dei na Umshyrpi ïaid sha jan Laban ter ter sha Bawri Mansion sha Shillong College nangta ka noh sha Polo lyngba ka wah duid haduh ka jaka ba don ka jaka siat tim bad ïaid pat sha Jingkieng Wahingdoh bad kiew pat sha Them Ïewmawlong bad terter sha Anjali bad poi biang ha jingkieng Umshyrpi.
Haba la kylli ka don lad ne em ba ka kur Nongkhlaw ban shim nongkynti biang ïa kane ka jaka la ong ba kan long kaba ym lah long namar kat kum ka soskular la ong ba lada don ka jingshim biang ïa kane ka jaka ki ïing bad ki jingtei ba la pynieng ka kur kan hap siew dor kat kum ka jingshongdor jong ki.
“Ban ong ban shimti biang ngam tharai kan dang ka kur lah namar kat kot da ki lak klur ka dor ki jingtei ba la ïeng ha kane ka jaka bad lada ka kwah shim biang ka kur Nongkhlaw kan hap siew lut baroh ki ïing bad ki jingtei”, u la ïathuh.
La ong ruh ba lada pyrshang wad jingtip ba baroh ki jaka kiba la ai sha ki riew shimet kiba ka sorkar ka ai wai kat kum u snem ba ki la ïateh la don ka kyndon ba la ong ba hadien ba kut noh ka por shim wai ka sorkar kan kheiñ haduh katno ka shongdor kata ka ïing ne ka jingtei bad kan sa siew pat da ka pisa bad kane hi kajuh ka kyndon kan long ruh ïa ka kur Nongkhlaw” u la bynrap.
“Ka jaka ka kur Nongkhlaw kan sah bad ka sorkar kum ka jaka shim wai ka sorkar hynrei kaba donkam hi ka dei ïa ka Kur ban ïa pynbeit ïa ki daw ïing ban ïoh bai wai na ka sorkar” ong shuh pat sa uwei u riewshemphang.