Shillong, Iaiong 21 : U Symbud Myntri Rangbah ka jylla u bah Prestone Tynsong ula kren shai kdar ba ka jinglong trai ïa ki jaka puta kan neh beit bad ki trai jaka bad ka sorkar Meghalaya ne Assam kim don bor ei ei ban mushlia halor kane ka jinglong trai namar ka jingpynbeit ïa u pud u sam kam mut ba lada hap ka jaka sha Assam kan dei noh ka jongka sorkar Assam bad lada hap sha Meghalaya kan dei noh jongka sorkar Meghalaya hynrei ka khyndew ka shyiap kan ïai neh beit bad ki trai jaka puta.
U la kren shai ïa kane namar ki don kiba kynnoh ba ka sorkar MDA ka la ai lut ïa ki jaka puta sha ka Assam hynrei kam mut kumta “ Ngi shu pynbeit ïa u pud u sam hynrei ïa ka jinglong trai ia ki jaka puta ne khyndew ka shyiap kan ïai neh beit bad ki trai hi. Kam pher lada ki hap ha u pud Meghalaya ne ha u pud Assam hynrei ki trai kin neh hi ki trai jaka puta” ong u Symbud Myntri Rangbah haba ïakren bad ki nongthoh khubor.
“ Nga kyntu namar kata ïa ki nongïalam seng saiñ pyrthei, seng bhalang bad wat ki bor synshar shnong ruh ba kim dei ban ïalam bakla ïa ki paid nongshong shnong ka jylla khamtam kito kiba ha khappud namar ki ar sorkar kim lah ban knieh ïa ka jinglong trai ki jaka puta. Lada hap sha Assam bad ki trai ki dei u nong Meghalaya kito ki jaka kan dei hi bad ki trai na Meghalaya bad kan long ruh kumjuh lada ka jaka ka hap sha Meghalaya hadien ka jingpynbeit pud, ka jinglong trai ki dei na Assam ki jaka kin hap hi jong kito ki trai na Assam”.
U la ïathuh ba na ka liang ka bor sorkar ka la bthah ïaki bor synshar District bad ki Block ruh ba ki dei ban pynsngewthuh shai bha ïa kane bad ki paid nongshong shnong ha khappud bad wat bad ki bor synshar ruh ba kim dei ban shah ïalam bakla da lei lei ruh.
“ Ngi la ïasoi soskular bad mynjur ban pynbeit ïa u pud bad ka kam kaba sah ka dei jongka Survey of India namar kane kan wan thew wan woh thik pathik bad hadien kata kan sa ai ïa ka kaiphod ba pura sha ka sorkar pdeng ba kan rah ïa kane ka kam hapoh ïing dorbar Parliament khnang ban ïoh ka jingmynjur halor kane ka jingpynbeit ïa u pud u sam pynkut, u Symbud Myntri Rangbah.
