Shillong, Risaw 17 : Ka KHADC ka la ong ba ki sngewkhia lang halor ka jingeh ba la pynpaw da ki Rangbah Shnong ka Sor Shillong haba ïadei bad ki jingjia kaba kum ki nongïalam shnong ki tyngkhuh man ka por haba ïadei bad ki bor sorkar.
Haba kren bad ki lad pathai khubor hadien ka jingïalang bad ki Rangbah Shnong na kylleng ki shnong ka Sor Shillong, u Deputy CEM ba dei peit ïa ka tnad Elaka, Bah Pynshngaiñ N Syiem u la ong ba kane kadei ka mat kaba khia bha kaba ki hap ban shimkhia.
Shwa kane, u Deputy CEM u la ong ba u mynjur ba ha ka por ba don ka khlam COVID na ka liang ka sorkar ka la ai ka jingithuh ïa ki Rangbah Shnong namar ka jinglah jong ki ban trei ryngkat ryngkat bad ki bor sorkar ban ïakhun ïa katei ka khlam ba shyrkhei.
“Ki Rangbah Shnong ki la pynpaw da kaba ong ba ha ka por ba don ka khlam COVID ïangi ki ithuh lut bad haba don ka kynrum kynram ïangi ruh ki ithuh lut hynrei haba donkam mangi pat ym don ba ithuh satia,” la ïathuh u Bah Pynshngaiñ.
Kumta, u la ong ba nalor ka Sanad ba la ai da ka Council sha ki Rangbah Shnong, ki sngewdei ban kyntu ïa ka sorkar jylla ba kan pynmih da kino kino ki kynja jingthoh kaban kdew ba la ai ka jingithuh ïa ki Rangbah Shnong khnang ba kin ym hap lang ha ka thup kum ki riewpaidbah haba ki mihkhmat kum ki nongkit nongbah ïa ka shnong ka thaw.
