Ki HNLC ki la wan poi da ka jingïasngewthuh jingmut ban sdang ka jingkren ïasuk: HM

Shillong, Nailur 04 : U Myntri Kampohiing ka Jylla, Bah Lahkmen Rymbui u la pyntip ba ki nongïalam ka HNLC, kaba dei ka kynhun kieng atiar ba la shah khein beaiñ, ki la poi ha ka jylla da ka jingsngewthuh jingmut ban sdang noh ïa ka jingïakren ïasuk khlem da buh kyndon lypa.
Na ka liang u Myntri u la pyntip ruh ba ka sorkar jylla ka la thung da u ophisar IAS ba la shongthait, u Bah Peter S Dkhar kum u ksiang ban lamkhmat ïa katei ka jingïakren ïa suk shakhmat bad kumta ka HNLC pat ka la jied da u President jong ka HNYF, u Bah Sadon Blah ban long u ksiang jong ki.
Da kaba kyntait ban kren ei ei halor ka bynta, u Myntri u la ong ruh,”Nga kwah ba ka jingïakren kan ïaid beit bad poi sha kaba jingpynbeit kaba kut khnang ba ka suk ka san kan synshar ïa ka jylla Meghalaya,” u la ong.
Halor ka jingkyrpad jong ka HNLC ban ai ka jingïada ïa ki nongïalam jong ka, u Myntri u la ong,”To ngin ym pat poi sha kata ka bynta namar ngi don ka jingkyrpad ba ka jingïakren kan long kaba seisoh.”
Dei ha ka 2tarik mynta u bnai ba ki nongïalam ka HNLC ki la pynbna ba ki la jied ïa u Vice Chairman jong ka, u Manbhalang Jyrwa, u Political Secretary u Aristerwell Thongni, bad Foreign secretary u Phrangkupar Diengdoh kynthup ïa ki nongpahara ba kynthup ïa u Aiborlem Marbaniang bad u Storgy Lyngdoh ban shim bynta ha katei ka jingïakren ïasuk hapdeng ka sorkar India, ka sorkar jylla bad katei ka kynhun HNLC.
Katei ka jingïakren ka la ïaid shakhmat hadien ba ka sorkar pdeng ka la ai ka jingmynjur ha u Naitung ban ailad ïa kitei ki nongïalam ka HNLC ba kin wan sha ka miej ïa kren ïa suk.