Ki (Harijan) don ka hok ban dawa, tangba ka Sorkar kan dang hap bishar: Conrad Sangma

Shillong, ïaïong, 27: U Myntri Rangbah ka Jylla u Conrad Sangma ha ka sngi Balang u la ong ba ki (Harijan Panchayat Commitee) don ka hok ban dawa hynrei ka Sorkar kan dang hap ban bishar bniah shwa bin pa bin.
“Mano mano ruh ki don ka hok ban dawa hynrei ngin sa hap ban bishar shwa haduh kat uno u pud uba ka Sorkar kan lah ban ïaid shakhmat,” ong u Conrad Sangma haba ïakren bad ki lad pathai khubor.
Haba pynpaw ba kane ka mat ka dei kaba jwat haduh katta katta bad kaba hap ban da phikir bha, ula ong, ‘la ki dei kiba sah hapoh ka jylla lane na kiwei ki jaidbynriew ha baroh kawei ka ri bad ha ka pyrthei baroh kawei ki la ïadon bynta ha kane ka ishu. Namarkata, kam dei satia ka kam kaba suk bad ngi la bishar bniah bha ïa kane ka kam da kaba thung ïa ka High Level Committee kaba la trei shitom bad kaba la dei ban ïoh jingïaroh.”
“Ïa kane ka mat, donkam ban ïasyllok bha bad donkam ruh ban pyntyllun shakhmat bad khatduh ngi la lah ban poi sha ka bynta kaba kongsan ïa kaba ngim ju poi pyrkhat ba ngin ïapoi haduh kane ka thong,” u la ong.
U la ong ruh ba kane ka kam mynta ka la don hapoh ka Ingbishar. “Dei halor kane ka nongrim, ngi la pynlong ka jingïakren bad ka jingïasyllok kaba bniah bha bad watla kane ka kam ka la long kaba jop hynrei ngin dang hap ban pyntyllun shakhmat ïa kane ka kam tad haduh ban da pynurlong ïa ka jingthmu,” bynrap u Myntri Rangbah.
“Kum kine ki mat kiba jwat yn ym lah satia ban shu ïakren tang hapoh shi sngi ne ar sngi,” ong u Myntri Rangbah haba jubab ïa ka jingdawa jong ka KSU ba ym dei satia ban pyndem hakhmat ka jingdawa jong ka Harijan Panchayat Committee.
Dang ha kine ki khyndiat sngi, ka Harijan Panchayat Committee (HPC) ka la dawa ba ka Sorkar kan ai jaka ei mar 200 square meter sha ki 342 tylli ki longing kiba sah ha Them Iewmawlong bad ban mang pisa ruh mar T.20 lak na ka bynta ban pynshna ing.
Ka KSU mynta ka sngi Balang ka la dawa ïa ka Sorkar Jylla ba kam dei satia ban shu pyndem hakhmat ki jingdawa jong ka Harijan Panchayat Committee (HPC) hynrei ka dei ban kheiñ ïa ki kum ki nongshongwai.
“Kumba phi la ïohi kumno la sdang ïa ka kam, ngi la lah ban pyntyllun shakhmat ïa ki jingïakren bad ailad ïa ka High Level Committee ba kan trei khnang ban dup lah ban weng ïa ki jingeh. Ngi hap ban buh jingmut ruh ba manla uwei pa uwei uba sah ha ka jylla Meghalaya u dei hi u u nongshong shnong jong ka jylla Meghalaya bad kamram jong ngi ka long ban ai jingïada bad ban pynthikna ba ngin weng ïa kane ka jingeh khlem da pynmong ïa ka jingsngew jong ki paidbah na baroh arliang mamla,” la jubab u Conrad Sangma haba kylli halor ka jingdawa jong ka KSU.
Haba kylli hato ka Sorkar kan pyntreikam neem ïa ka aiñ ban kyndang ïa kine kiba sah ha Them Iewmawlong, u Conrad u la ong, “ka jingkylli kaba mih mynta ka long balei ka Sorkar barim kam shym la leh ïa kata. Lada ngin pyntreikam ïa kane ka aiñ kan mih ka jingkynnoh na kiba bun ki liang. Mynta ka Sorkar ka hap ban shim ïa ka jingkitkhlieh.”
“La sanphew snem ngi la ap, ïai ap sa tang katto katne bnai bad ngin sa pyrshang ban leh ha ka rukom kaba dei. Kumba long ka ishu ïapynbeit pud kaba la 50 snem, ïai ap sa tang hapoh khyndiat bnai bad ngin sa ïohi kumno ka kam kan sa ïaid,” ula ong.