Ki Govt. Higher Secondary bad Secondary bun ki bym don nonghikai bad Principal

Shillong, Nailur 04: Man ka sien ba ka MBOSE ka pynbna ïa ka resol klas 10 bad 12 ngi sakhi ba ka sorkar bad u Myntri ka tnad pule puthi ki kynnoh beit ba ka jingbym pas bha ki khynnah skul bad ka jinghiar ka jingdon kiba pas na ki skul sorkar ka dei beit namar ba ki khynnah pule ba leit pule ha ki skul sorkar ki dei kiba la shah kyntait ha kiwei ki jaka pule ba kim banse ban leit la ka leit namar ka jingbym ïoh skul ha ki skul sorkar ba sa hiar ka jingpas ki khynnah(pass percentage).
Hadien ba man ka por a ïohi ba kam don satia kano kano ka jingkit khlieh na ki bor sorkar na ka liang u Mawphor u a pyrshang ban wad shuwa tang ïa ka jingdon ki nonghikai bad ki post ba thylli ha kine ki skul sorkar la lap ba kat kum ka jingtip ba a ïoh lyngba ka RTI kiba bun bah ki skul kiba ki post kiba thylli. shuh shuh la lap ba ym tang ba bun ki skul kiba ka sorkar kam buh nonghikai hynrei wat ki Principal bad Vice Principal ruh kiba bun bah ki skul kiba thylli da ki bun bnai bun snem.
Haba phai sha ka South West Khasi Hills kaba ka skul sorkar ha ka kyrdan Higher Secondary ka dei tang ka Maharam Government Higher Secondary School hynrei la lap ba na pdeng ki 23 tylli ki post kiba la mang na bynta ki nonghikai haduh 8 t6ylli ki thylli don, napdeng kine ki post kiba thylli naduh u snem 2018. Ym tang ba ki post nonghikai kiba thylli hynrei la lap ruh ba ym don Principal bad Vice Principal naduh u snem 2021.
Haba phai pat sha ki skul Higher Secondary ha Ribhoi District ki don ar tylli kata ka Patharkhmah Govt Hr SS bad ka Jirang Hr. Sec School, kat kum ka jingtip lyngba ka RTI la lap ba ha Jirang Govt Hr. SS ka sorkar ka mang 24 tylli ki post nonghikai bad napdeng ki 24 tylli ki don 12 tylli kiba thylli bad la lap ruh ba ym don Principal. Ka Jirang Govt Hr. SS napdeng ki 19 tylli ki post kiba la mang ki don 5 tylli kiba thylli knangta hangne la lap ba ym don Principal bad Vice Principal satia.
Shuh shuh la lap ba ki skul kiba don ha sor Tura bad Shillong kiba ki kham duna ki post ba thylli ha kaba ha Tura Govt. Boys na ki 40 tylli ki post ba la mang ym don kaba thylli lait noh ka post Principal kaba thylli naduh u snem 2017, kumjuh ruh ka ka Govt Girls Hr. SS Shillong pat na ki 31 kiba la mang ym don ba thylli lait noh tang ka post Principal kaba thylli naduh u snem 2021, katba ha Govt Boys. Hr SS Shillong na ki 47 kiba la mang 3 tylli ki thylli naduh u snem 2021 bad ruh ym don Principal naduh u snem 2021.
Haba phai sha ka skul Pine Mount ka sorkar ka mang 59 tylli katba kiba thylli ki don 3 kiba ym pat don ba pyndap naduh u snem 2014, 2018, 2021 nalor ka post Vice Principal kaba thylli naduh u snem. Ka Shillong Public School na ki 28 kiba la mang ki don 2 kiba thylli naduh u 2021 bad 2022 nalor ka post Vice Principal kaba thylli naduh u 2011, Ka Sohra Govt Hr. SS, Sohra na ki 7 kiba la mang kaba thylli ka dei tang kawei katba ha Tirot Sing SS, Laitkynsew na ki 9 kiba la mang kiba thylli ki don 2 naduh u snem 2019 bad 20220 katba hangne ym don Vice Principal.
Lada peit pat sha ka Dadenggre Puri Govt Hr SS hangne ruh ym don Principal bad ki post nonghikai kiba la mang ki don 22 ha kaba 16 tylli ki post Asstt Teacher kiba la mang, 5 tylli ki don ki nonghikai ba pura katba 11 pat la shu pyndap da ki nonghikai contract bad na ki 6 ki post Asstt Lecturer 2 tylli la shu pyndap da ki nonghikai contract.
Shuh shuh lada phai sha ka Dulu Govt Hr SS na ki 26 kiba la mang 18 kiba don ki nonghikai pura katba 8 kiba shu pyndap shipor da ki nonghikai contract bad hangne ruh ym shym la don Principal naduh u snme 2016 bad Vice Principal naduh u bnai Naitung mynta u snem.