Ki Dorbar Shnong ki dei ban mih shakhmat lada don ki nonghikai kiba aiwai sha kiwei: Lahkmen

Shillong, K’Lyngkot 11: U Bah Lahkmen Rymbui uba dei u MLA jong ka United Democratic Party (UDP) uba dei ruh u Myntri Sorkar ba peit ïa ka tnad pule puthi u la kyntu ïa ki bor shnong ba kin mih sha khmat ban buh ka jingujor lada don ki nonghikai skul kiba ju ai wai sha kiwei pat.
“Kane ka jingtip kam dei shuh kaba dng thymmai hynrei kadei kaba la slem bha, halor ka jingkynnoh ba ki don ki nonghikai skul kiba ïa lade kim leit ban hikai skul hynrei ki shu ai wai sha kiwei pat” ong u Bah Lahkmen Rymbui.
Shuh shuh u Bah Lahkmen u la ong, “Katkum ka jingtip jong nga kam pat don kawei ruh ka report na ki shnong ki ban ong ba une u nonghikai u shu siew nong ïa ki briew shato ïa lade pat um leit hikai”.
“Lada don kiba kum kita ki nonghikai skul, Ka skul Managing Committee bad ka Dorbar Shnong kidei ban pyntip namar ba kam dei kaba suk ïa ki Sub-Divisional School Education Officer (SDSEO) bad ïa ki SI ba kin peit bniah man ka sngi ïa kawei pa kawei ka skul” ong u Bah Lahkmen bad bynrap ruh “Bapli man ka sngi ki leh shitom ban leh ïa kaba donkam, hynrei ngam tharai ba kin lah lada ym don ba ai jingtip sha ki”.
Shuh shuh u Bah Lahkmen u la ong, Ka skul kam dei ka nongkynti jong ka sorkar hynrei ka dei ka nongkynti jong u paidbah bad ki nonghikai kiba hikai hangto uba la ïoh ïa ka tulop da ka pisa u paidbah u dei ban hikai hok.
Halor kane u Bah Lahkmen u la buh ka jingkyrpad ïa baroh ki bor shnong bor thaw ba lada don kum kita ki nonghikai, mardor kidei ban pyntip sha u Director jong ka tnad pule puthi ne sha ki SDO Civil Sub Division ne wat sha ki Deputy Commissioner khnang ban lah ban khang lad ia kum kita ki jinglehtuh.