Ki Dorbar Kur ki dei ki païa ba khlaiñ tam ban ïada ïa ka jaidbynriew; ong u Parad N.S.Marweiñ

Nongstoiñ, Naitung 30 : Katba ka por ka nang ïaid ki jingkylla ki nang bun la ka long ha ka synshar khaddar, ka jingnang jingstad ,ka kamai kajih, ka ïoh ka kot bad wat ha ka kheiñ kur kheiñ jait kat haduh ba ki don ki bynta kiba la shu kynmaw tang na ki khana pateng khlem ki jingthoh jingtar kiba lah ban pynshisha.Ha kaba ïadei bad katei ka mat u nongthohkhubor jong u Mawphor u la ïoh ban ïakren bad u parad N.Sranly Marweiñ uba shong ba sah ha ka shnong Tiehsaw kaba don harud ka surok bah National Highway 44 (E) Shillong – Tura uba la dap mynta 89 snem ka karta uba dei ruh u riew tymmen uba shemphang bha ïa ka kheiñ kur kheiñ jait.
U la ong ruhba lada phai ha ka jinglong jingman jong ka jaitbynriew Khasi ha kane ka jylla ha kine ki sngi la i kumba kiei kiei ki la kylla khongpong lut bad ka jaitbynriew ka la nangsynjor bad ka lad kaba bha tam ban ïada ïa ka jaitbynriew ka dei ban pynkhlaiñ ïa ki dorbar kur namar lada ki dorbar kur ki khlaiñ ki dorbar shnong ruh ki khlaiñ bad ki nongwei nongar , ki dkhar ki lynkien, ki wan wir ki wan hap kin ym ïoh lad ban wan rung lait luid ha ki shnong ki thaw.
Nalor kata u la ong ruh ba haba phai ha ka jinglong jingman jong ki jaka bad ki shnong ki thaw ki la kylla nadong shadong .U la ong ruh ba naduh ba ka sorkar ka la dep ban pyntrei ïa ka surok National Highway ki shnong ki thaw naduh Nongstoiñ haduh Shillong ki la roi sted haduh katta katta, ka kamai kajih jong ki paitbah kiba don ha ki shnong kiba harud surok ka la kiew sted bha. U la pynkynmaw ruh ba ha ki arpew snem mynshuwa ka surok naduh Markasa shaduh Nongshilong ka kynjah jar jar hynrei ha kine ki sngi shilynter ka surok naduh Markasa shaduh Nongshilong ki nongdie jingdie harud surok naduh ki dukan sha haduh ki dukan rit kiba die sohphlang ki la jan kot spah tylli bad ka ïaid ka ïeng ka la shit ka la shngaiñ bha.
Utei u parad u la ong ruh ba wat la ki shnong ki thaw ki la shit la shngaiñ, ka kamai kajih ka ïoh ka kot ka la nang kiew hynrei ki nongshong shnong pat imat bun kiba la sdang ban klet noh ïa ka riti ka dustur, ka kheiñ kur kheiñ jait kaba la buh beit naduh hyndai kulong bad ka ba la suit la shor da ki long shuwa man shuwa.
Nalor kata u la ong ruh ba ha kine ki sngi ki la don bun bah ki briew na ka jait bynriew Khasi jong ngi ki bym sngewthuh shuh ïa ka tynrai jong ka kheiñ jait bad ki la ñiewsting ïa ka dor jong ki Kñi hapoh ka kur ka jait bad ki don ruh wat kiba nud ban pynkylla khongpong da kaba ai jait noh sha u kpa. Ha kaba ïadei bad ka jingai jait sha u kpa u la ong ba na ka liang ka Kur Marweiñ ka la buh ka jingmana kaba pyrkhing bha ïa baroh ki jait Marweiñ ba kim bit da lei lei ban ban leh kumta lada dei u shynrang ban leit shim ïa ka jait jong ka kynthei kaba dei na kawei pat ka jait bad pynlong jait ha lade lane ba ka kynthei jait Marweiñ kan leit ai jait noh ïa ki khun sha u kpa bad lada don kiba leh kumta ka kur kan ym ithuh shuh ïa ki ba ki dei na ka jait Marweiñ bad lada ki ïa kynduh ïa kino kino ki jingeh ki hap ban kitkhlieh hi nadong shadong.
Ha kaba ïadei bad ka shongkha shong man utei u parad u la kren bynñiaw da kaba ong ba ha kine ki sngi ka shongkha khlem pat dei por ka jur bha bad dei na kane ka daw ba ka jingkit khunrei ka kiew bha khamtam ha ki nongkyndong.
U la ong ruh ba ha ki por ba mynshuwa ki samla shynrang haba ka por ka la dei ban shongkurim ki ju kylli pyrthew shuwa ha ki kmie ki kpa bad ki da ïathuh ruh ba ki la don ki samla kiba ki itynnad bad ki da leit kai borabor sha ïng jong ki kynthei ban ïashong kai suwa bad ki kmie ki kpa bad ban ïapur khana bad bad kid a kaba kren pharshi ruh ba ki don jingmut ïa ka khun jong ki hynrei ha kine ki sngi pat kalong kaba sngewsih ba ki don shibun ki khun kynthei bad shynrang kiba ki kmie ki kpa ki phah skul sha ki jaka ba jngai hynrei ka jingpule kim pat dep la shuwa ka wan ïalam pyrsa ha ïing.
Khatduh eh utei u parad u la kyntu ïa baroh ki nongshong shnong khamtam eh ïa ki samla ba ki dei ban burom bad ñiewkor ïa ka jingpule ym ban kyrkieh ban shong kha namar haba ka pule dangle kam pat biang kan wanrah bun ki jingeh ha ka long ïng long sem jong ki.