Ki don ki briew kiba kam nongïalam ka BJP kiba pynthohbria ïa ka seng, ong u MDC ka Tura

Shillong, Jylliew 25: U MDC ka BJP na Tura bad u state vice president u Bernard N Marak ha ka sngi baar u la ong ba ki don ki briew kiba thok kiba la kam ba ki dei ki nongïalam jong ka BJP kiba la thaw ban wanrah ka jingkulmar bad pynthohbria hapoh ka seng BJP ha kaba ki la pynmih ïa ka jingkynthoh pyrshah ïa ki nongïalam jong ka BJP.
“Dangshen ka la don ka jingkynthoh ba la kam ba ki dei ki nongïalam na Garo Hills pyrshah ïa ki nongïalam jong ka BJP. Kum kine ki jingkynthoh ki la mih pyrshah ïa Pravari jong ka Meghalaya u Dr M Chuba Ao bad kumjuh ruh ïa u State President Rikman G Momin ha kaba kine ki dei ki nongïalam kidei kiba thok jong ka seng BJP,” ong u Marak ha ka kyrwoh khubor.
U la ong ba ki paid Garo bad ki nongïalam ki la pdiang sngewbha ïa ka rai jong ki nongïalam ka sengkmie ban ym pynïeng kyrtong ha ka Lok Sabha Elekshon.
“Kito ki bym sngewtynnad ki la iehnoh ïa ka seng bad katto katne ki dang don ban kam ba kidei ki party karyakarta. Kine ki nongïalam ba shukam ba kidei na ka seng BJP, kiba la kam ruh ba kidei na Garo Hills, kim ju kwah satia ban pynpaw ïa ka kyrteng jong ki, ki la dei ruh kito kiba la iehnoh ïa ka party ha ka por ka Lok Sabha election ne kito kiba sngew bynniaw ban ïohi ba ki paid Garo ki don hapdeng ka jingïatylli. Ngi dei ki nongïalam ba hakhmat hapoh ka thaiñ Garo Hills bad ka don ka jingïalong kawei hapdeng jong ngi bad ka party baroh kawei. Hynrei ki la don ki nongthoh khubor kiba la pynmih ïa ki jingkren na kitei ki nongïalam ba shu thok,” ong u Marak.
U la bynrap ba ki nongïalam jong ka BJP ki la pynpaw ïa ka jingpyrshah ha kaba kane ka dei ka dak ban wanrah ïa ka jingïapher jingmut ne ka ban phiah ïa ka party.