Ki don bun ki nongïalam ba tbit ban shimti ïa ka kam General Secretary : President UDP

Shillong, Jylliew 02 : U President jong ka United Democratic Party (UDP), Bah Metbah Lyngdoh ha ka sngi Nyngkong u la ong ba ki don bun ki nongïalam ha ka party kiba la bit bad la pura ban shimti ïa ka kam General Secretary jong ka party.
Kane ka jingkren jong u President kadei hadien ba u Dr. Jemino Mawthoh u la resain kyndit kyndit na ka party da kaba ai daw ba na ki kam shimet u la hap ban weng noh ïa lade kum u nongïalam ka party bad na baroh ki kam kiba ïadei bad ka party.
Kumban shu kdew hangne, u Dr. Jemino ba dei ruh u MLA barim ka Nongthymmai u la phah ïa ka shithi iehnoh kam kum u nongïalam ka UDP ha ka 20tarik u Jymmang.
Kumta, haba kren bad ki lad pathai khubor ha kane ka sngi Nyngkong, u Bah Metbah u la ong biang, “Halor kane ka jingresain noh jong u Bah Jemino ngin sa rah bad ïa kren ha ka party kaban sa long shen.”
Haba jubab pat halor ka jingkylli ba ïano ka party kan jied ban shimti ïa kane ka lyngkor, u Bah Metbah u la ong, “Ka party ka don bun bha k inongïalam. Kumta ka shong ha ka party mano na kine kiban sa shimti ïa kane ka kam.”
U Bah Metbah u la kyntait ruh ban jubab halor ka jingphriang ki khubor ba utei u nongïalam barim ka UDP u lah ban phet noh sha kiwei ki party heh kiba don ha ka jylla. “Nga kwah ban kren shai halor kane ba katkum ka shithi hi u Bah Jemino u la ong ba dei na ki daw shimet jong u bad ka paw hi ba un ym leit pynïasoh bad kano kano ka party.”
Shuh shuh haba jubab ba haduh katno kane ka jingmih jong u kan ktah ïa ka party baroh kawei, ka jubab ba u President u ai ka long, “Kum ka party hi ngi trei beit kum ka kynhun bad watla katta ruh shisien ba la mih noh u wei u dkhot kan don beit ka jingbynnud. Hynrei ka kam jongngi ka long ban ïaid shakhmat namar ha kaba khatduh dei ka party hi kaba treikam.”
Ha kajuh ka por pat u la kyntait ruh ïa ka jingkynnoh ba ka lah ban dei na ka thma pohiing kaba pynlong ïa u Dr. Jemino ban shim ïa katei ka rai. “Phi la ïohi ba wat ha ka shithi u Bah Jemino u khlem kynthoh ne bynnïaw ïano ïano hynrei u ong beit na ki daw shimet.”
Lah ruh ban kdew hangne ba ka UDP ka don haduh 12 ngut ki MLA ha ka jylla, bad kadei ruh ka party kaba ar ha ka jingdon bun ngut eh ki MLA ha ka Iing Dorbar Thawain ka Jylla ha kane ka samoi san snem.