Ki doktor ki dei ban sumar ïa ki nongpang, ym ban bunkam pynïaid hospital : Dr. Ampareen

Shillong, Jylliew 27 : Ka Myntri jong ka tnad ka Koit ka Khiah ka sorkar jylla, Dr. M Ampareen Lyngdoh ha ka sngi Palei ka la ong ba ha ka jingïalang bad ki heh sorkar jong ka tnad ki la ïakren sani bha na ka bynta kumno ban pynjanai ïa ka jingtreikam ki jaka ai jingsumar kiba don ha ka jylla khamtam eh ha ki bynta ba kham kyndong jong ka jylla.
Haba kren bad ki lad pathai khubor, ka Myntri ka la ïathuh ba ka tnad ka la ïakren ruh ban peit ba ki doktor kiba don ha kino kino ki jaka sumar kim dei satia ban shah pynbunkam than ban pynïaid ïa ki kam jong ki hospital. “Ka kamram jong ki ka long ban sumar ïa ki nongpang kumta ym dei ban pynbunkam ïa ki ban pynïaid ïa ki kam jong ka hospital. Kumta nga la ong ïa ki Ophisar ban pynkylluid ka por ïa ki doktor namar lada ki bunkam noh ha kiwei ki kam kin ym don por shuh ban peit ïa ki nongpang,” ka la ong.
Khnang ban pynsting ïa ka kam jong ki doktor, ka Myntri ka la ïathuh ba ka la bthah ïa ki ophisar ba kin ong ïa ki tnad ba dei peit ba kin thung bujli noh da ki briew kiba tbit ha ki kam ban pynïaid ïa ki kam ophis bad lada donkam ban pynkha ïa kita ki jait kam khnang ba kin lah ban peit ïa ki kam ba la phah.
Ha kajuh ka por ka la ïathuh ba ha ki khyndiat por ba la dep ka la ïoh ban leit jngoh kylleng ki jaka sumar bad ka la lap ki don bun ki santion post bym pat pyndap.
“Man ki jaka ba nga leit jurip nga ïohi ba ki don ki jaka ba duna nongtrei kumta ïa kane nga la pynsngew ha u Myntri Rangbah khnang ba ngin lah ban ïoh thung briew noh kham kloi,” la bynrap bïang ka Myntri.
Nalorkata, ka ong ruh ba ka jingthaw ïa ki jaka sumar kan sepei lada ym don ki briew ban trei bad dei na kata ka daw ka kyntu ïa ki ophisar ba ïa ki jaka sumar ba la dep shna dei ban plie noh bad ruh ban peit ba ki nongtrei ki la don lypa namar lada plie khlem don nongtrei kan nang buh jingeh kylla.
Ha kajuh ka por ka la kyntu ruh ban peit ïa ki jaka sumar kiba la rim bha kiba bun ki la sdang ban pei bad buh jingeh na ka bynta ki nongpang.
Shuh shuh la ïathuh ba ha ka taiew ban wan kan leit sha nongbah Delhi ban kynduh ïa u Myntri ka tnad ka Koit ka Khiah ka Sorkar Pdeng bad ruh ïa u Myntri ba peit ïa ki Kam Rep na ka bynta ban ïoh ïa ka jingkyrshan jong ka sorkar pdeng ïa ki jingdonkam jong ka jylla Meghalaya.
“Ngin leit lang ryngkat ki ophisar kynthup lang ïa u Director ka NEIGRIHMS namar ngin ïoh ban ïa kren ruh ïa ki kam ba ïadei bad katei ka jaka sumar kaba don ha ka jylla,” ka la ong.
Haba ïadei pat bad ka ishu jong ki nongrep, ka Myntri kaba dei ban peit lang ïa ka tnad ka Rep ka Riang ka la ong ba kin ïa kren bad u Myntri ba dei peit halor ka PM Kissan Scheme, nangta ruh ban kren wat haba ïadei bad ka jingeh ban rejistar online ïa ki nongrep, nangta ka minimum support price bad kiwei kiwei.