Nongstoiñ, Naitung 06: Katba nangmih ki sngi ki jingpang ba har rukom ki nangmih, kat haduh ba ki paitbah nongshong shnong ki la hap ban pynlut da ki hajar phew hajar bad da ki lak tyngka, ha kaba leit phah sumar ym tang ha ki jaka sumar hapoh ka jylla hynrei wat shabar ka jylla ruh.
Tang kumba katto katne snem ba ki paitbah kiba ïoh ïa ki artylli ki jait jingshitom, kata ka jingpang shini bad ka jingpang stroke ki la jyllei haduh katta katta bad ïa kitei ki jait jingpang, wat ki doctor kiba la pyndep ïa ki jingpule jong ki ha ki laiñ bapher bapher ruh ki shem shitom bha ban pynkoit.
Bun ki nongpang kiba ïoh ïa kitei ki jait jingpang ki leit ban phah sumar, ha kaba kut ki hap ban shu phah leit phai noh sha ïing bad shu bthah ïa ki nongpang ba kin dih tista ïa ki dawai bad sumar bha ïa ka rukom bam rukom dih, hynrei ban pynduh ïa kitei ki jait jingpang imat ka dang shem jingeh.
Hynrei, u Bah Donbok Marweiñ uba shong basah ha ka shnong Mawrusyiar West Khasi Hills kaba don harud ka surokbah National Highway 44 (E) Shilong-Tura, u dei uwei na ki doctor ba ju sumar ïa ki nongpang ba bun jait da ki dawai kynbat Khasi bad u ba la paw bha ha kane ka kam.
Ha ka jingleit ïakynduh u nongthoh khubor, la lap ba u pynlong jaka sumar ha ka ïing kaba don ha syndah bad ka ïing ba u shong u sah. Ki don artylli ki jingthiah bad ka don sa kawei pat ka ïing kaba don kham pajih na ka jaka sah jong u kaba don kumba san haduh hynriew tylli ki jingthiah na ka bynta kiba shitom kiba wan ban phah sumar.
Ki don bun ngut ki nongpang kiba wan phah sumar ha utei u rangbah bad ki jingpang ba ki ïoh ki dei ka jingpang ba ju khot ka stroke. La ïoh ruh ban ïakren bad ki nongpang kiba shah sumar ha kaba uwei u rangbah uba dei na ki thaiñ Rambrai u la ong ba ha kawei ka miet hadien ba u la dep bam ja u la shu kyllon kynsan ha madan bad um tip briew shuh bad um lah shun ban khih shilliang ka met naduh kti haduh kjat.
Ha katei ka por ki bahaïing ki la pynkitnoh mar mar ïa u sha ïng jong u Bah Donbok Marweiñ bad hadien ba u la shah sumar tang saw sngi u la lah ban ïaid, hynrei namar ka jingshitom kam pat da khuid bha u dang hap ban pyndonkam da u dieng duh.
Uwei pat u briew uba shitom u la ong ba ha kawei ka miet u la kyllon kynsan bad um tip briew shuh bad la pynkit ïa u sha kawei ka jaka sumar ha Shillong bad haba la poi ha katei ka jaka sumar wat ïa ka jingbam ruh la shu pynrung da u pipe na ki thliew khmut namar um lah shuh ban pynkhih ïa ka kti kamon bad ka kjat kamon.
Ula ong ruh ba hadien shitaïew tam ki doctor na katei ka jaka sumar ki la phah mih noh bad ki la bthah ïa u ba un leit noh bad un shu dih dawai ha ïng. Nalor kata u la ong ruh ba la palat artaïew u la shu thiah ha ïng bad u la dih tista ïa ki dawai hynrei kam shym ïarap satia.
U la ong ruh ba dei da ka jingtrei shitom ka lok jong u ban wad jingtip shaphang ki nongsumar ba ka lok jong u ka la ïoh jingtip shaphang u Bah Donbok bad ki la wan ban phah sumar bad ha ka jingwan phah sumar ha u tang hadien shi taïew u la lah ban ïaid bad ban pynkhih ïa ki kti ki kjat bad u la sngew khlaiñ ka met ka phad.
Kum ban pynkynmaw ba u Bah Donbok Marweiñ um dei satia u ba la leit pule doctor hynrei u don ka sap kaba kyrpang ban sumar ïa kiba pang ba shitom tang da ki dawai kynbat Khasi bad mynta u bat ruh kum u president jong ka Synjuk Ki Nongai Dawai Khasi Nylla ha West Khasi Hills.
