Riangdo, Nailar, 18: Ka Khasi Student’s Union Lai Hima unit kaba hap hapoh ka jylli treikam jong ka KSU Mawshynrut Circle, ha ka sngi balang ka la ïoh ban pynthymmai ïa ki nongkitkam jong ka na bynta ka samoi treikam 2022-25
Ha katei ka sngi la pynïaid ïa ka prokram lyngkot da u samla Wanbhakupar L Nonglait Organising Secretary jong ka KSU West khasi Hills District unit, Armstrong Sohshang President KSU Mawshynrut Circle bad kiwei kiwei. Haba ai jingkren u la pynkynmaw la seng ïa ka KSU ha u snem 1978 bad ka jingthmu jong ka seng, ka long ban peit kyrpang ïa ki khynnah pule kiba kynduh jingeh ha ki jaka pule ka jong ki ban ïoh rung ha ki college lane University bapher bapher.
Hynrei katba nang ïaid ki sngi ki por ka KSU ka dei ka seng kaba kam lah ban shu shong kli kti ne shu sngap ïa ki jingeh kiba wan ha ki jaitbynriew hi baroh kawei. Dei halor kata ka nongrim ba ka seng ka ïohi ha kine ki sngi ki por ki ïaleh katba lah ban ïada ïa ka Ri bad ka jaitbynriew ban neh pynneh pynsah ïa ka riti ka dustur u mynba rim. U la ong ruh haba rung sha ka seng ka KSU kam don eiei ban ai, hynrei ka KSU ka pynkhmati ïa ki dkhot ban shakri ïa ri bad ka jaitbynriew.
U Samla Willbest Wanñiang Education Secretary KSU West Khasi Hills District Unit, u la kyntu ïa ki dkhot ban kïar na ki kam politic ki la sdang ban rung ha man la ki thliew ïing bad ha man la ki jaka. Namar ha kum kane ka por la jan ka election, kine ki politician ki sdang ban khroh ïa ki dkhot bad ki nongïalam jong ka seng, tang na bynta ka myntoi shimet jong ki. U la ban jur ban kïar na ka rynsan politic namar ka riti treikam ka seng kam shah ïano ban ïadon bynta ha ki ar kynrad bad jia ba lada don uno uno ba pynkheiñ, yn weng beit shi syndon lada dei ïa ki dkhot ne Nongïalam.
La pyntian smai ïa ki nongkitkam bad ki dkhot ka KSU Lai Hima unit da u Samla Spaiñdarsing Lyngkhoi Office Secretary KSU Sengkmie. Haba ai jingkren u la ong ba haba rung ha ka seng ki dei ban rung da ka jingkitkhïa, ym ban rung kum ka tamasa. U la ong ban long nongïalam kam dei kaba suk namar hap ban mad shibun ki jingeh. Ha ka jingïaid lynti don kiba kynthoh bad kynthoh, hynrei to shim ïa ki jingkynthoh kum ki jingsneng ban nang ïai tei skhem shuh shuh ïa ka nongrim. Shim ïa ka jingïaroh kum ka jingkyrkhu ym ban kiew skong, namar kan ïalam sha ka jingjot bad jah burom.
U la pynkynmaw ruh ïa ki samla ba kin long kiba la khreh ban mih shakhmat lada ka jaidbynriew ka dawa, namar la sakhi bad ïohi ha kine ki sngi ba ka sorkar ka sngap mynthi halor ki mat kiba bun kaba ka seng ka ju pynsngew. Ki nongïalam bad ki dkhot ka KSU Lai Hima Unit ki long Korbarlang Marthong President, Fairbording Marthong General Secretary, Shanbor Marthong Organizing Secretary, Banteibor Marthong Education Secretary, Arborlin Marthong Publicity Secretary bad kiwei kiwei.
