Shillong, Jymmang 03: U MLA ka Mawlai Konstitwensi u Bah Process T Sawkmie ha ka sngi Hatmajai u la dawa ba ki dkhot Meghalaya State Olympics Association kiba pynïaid ïa ka Meghalaya Games 2022, ki dei ban iehnoh ïa ki kam ba ki bat haba ïadei bad ka jingthurmur jong ki haba pynïaid ïa ka lympung ïalehkai kaba heh hapoh ka nongbah.
U Bah PT Sawkmie u la pynpaw ïa ka jingsngewsih kthang hadien ba ïohi ïa ki jingmih khubor bad jingsaphriang ha ki social media ïa ka jingthurmur ka rukom pynïaid ka MSOA na ka bynta ban pynbiang jaka sah ïa ki nongshim bynta na ki 12 tylli ki distrik ha ka Meghalaya Games 2022 ha madan Polo.
Halor ki paikhana ba i saitmet, ka jaka thiah, ki jaka sum kibym biang, bad bun kiwei ki kynrum kynram ba ki nongpynïaid kim shym la lah ban pynbiang u Bah PT Sawkmie u la ong ba ka MSOA ka la pynlehraiñ jur ïa ka Meghalaya bad u la pynrem haba ïadei bad kane.
U Bah Sawkmie u la pynpaw ba ka MSOA ki dei ban shim ïa ka jingbahkhlieh bad halor kane ka nongrim ki dei ban hiar na ka kam ba ki bat.
U ong ruh, “Baroh shi katta la pynpaw ba kin pynlong ïa ka National Games, tang ïa ka Meghalaya Games ruh kim lah ban pynïaid hok, kumno yn lah ban shanñiah ban pynïaid ïa ka National Games. Ka sorkar kam dei shuh ban dang ithuh ïa ki dkhot ka MSOA.”
U la ong ba na ka liang jong u um lah ban shu sngap jar haba ïadei bad kane ka jingjia, namar la ïohi kumba ka long, kim kheiñ briew shuh ïa nongïalehkai sports, hynrei la ñiew ïa ki kum ki mrad.
Haba khmih ïa ka jingpynkhreh haba peit namar la ïohi kum ka Taj Mahal ba la shna ha Polo, namar la iphuh bha, hynrei shapoh pat la ïohi ba kim shym la shimkhia, kaban pynduh mynsiem bha ïa ki nongïalehkai Sports haba ïa dei bad kane.
U la ïaroh ruh ïa u myntri rangbah ka jylla u Conrad Sangma, hadien ba u la ïohi ïa ki jingsaphriang ki dur jong ka jingbym biang dalade hi u leit sha madan ban khmih bad lap ïa ka jingshisha.
U la kyntu ïa ka sorkar, ai kane kan long ka jingsneng bad hadien habud ka sorkar ka donkam ban shimkhia bad pynlong ruh ïa ka jingjurip ba kyndit shuwa ban pynlong ïa ki Lympung kiba heh hapoh ka jylla.
Halor u myntri ki kam sport, Bah Banteidor Lyngdoh, u la ong ba hadien ba la ïohi ïa kane ka jingjia, mar mar u la dei ban leit sha jaka ban khmih da la ki jong ki khmat, hynrei na ka liang u Bah Banteidor la ïohi ba u la shanñiah tylli ha ka MSOA bad um poi pyrkhat ba kane ka association kan long kumne, ba kan ym don ïa ka jingbahkhlieh, u kyrmen ba u myntri ki kam sport un shimkhia ba kum kine kin ym jia shuh hadien habud.
