Naba ki dohksah ha ki kynroh jong ki snier ki nang ring tlot, ‘ ka jingtyrha ka shadem lane ka jingbym tylliat kpoh (dyspepsia) ki ju kham jia bha, ha kaba ka kham pynshitom shuh shuh ïa ka met na ka bynta ban pynïaid beit ïa ka bam. Kane ka lah ban wanrah ïa ka jingsuh ne ktah, ka jinglong kynroi prie, ka jingdap lyer ka kpor. Lehse phi lah ban pynduna lane wat ban weng ïa kino kino ki jingeh da kaba pynbiang ïa ka rukom bam bad ka rukom dih dawai ka jong ngi.
Kaba bam bun palat lane kaba bam sted palat, ka jingdih duma, kaba bam ïa ki katto katne ki jingbam lane ka jingdih kiad, baroh kine ki lah ban ïalam sha ka jingbym tylliat bha ka kpoh. Ki dak ki shin ki lah ban ïapher naduh ka jinglong suh ha ka bynta ba shaneng jong ka kpoh haduh ka jinglong kynroi prie, ka jinglong dap lyer ka kpoh lane sieb. Kane ka jingbym tylliat bha ka kpoh bunsien kam dei kaba jur ne don jingma, tangba ka long pat kaba donkam ban leit ïa kynduh ne ïathuh ha u doktor lada shem ïa kine harum: (a) Lada kata ka jingsuh ka ïai neh bad khie na ka por sha ka por. (b) Lada mad ïa kata ka jinglong dap lyer bad jyreh na ka por sha ka por, ka jingnang jur ka jingsuh lane ka jinghiar ka jingkhia. (k) Lada phi prie da ka snam lane lada ka paiñkhana ka long rong ïong bad eh.
Lai tylli ki daw ba kynrei bha jong ka jingbym tylliat bha ka kpoh ki long:
1. Ka Gastro-oesophageal reflux, lane kata ka jinglong jyreh kaba jia haba kita ki dohksah ha ka bynta ba ïasoh jong u pdot ne tyngkro bad ka kpoh ki tlot, da kaba ailad ïa ka acid jong ka kpoh ban kiew biang shaneng bad mih shabar jong u tyngkro.
2. Ka Hiatus hernia- kaba ktah ïa shi bynta na ka lai bynta hapdeng ki briew kiba la palat ïa ka 50 snem- ha kaba ka bynta jong ka kpoh ka kiew shajrong lyngba ka jingtlot ha ka diaphragm.
3. Ka jingdih dwai: kita ki dawai ba ïaleh pyrshah ïa ka jinglong tyrha bad pdung ki lah ban pynthut ïa ka jingtreikam jong ki syrtap jong ka kpoh lane ki snier rit, ha kaba ha ki jingjia kiba shyrkhei ne jur ki lah ban ïalam sha ka jingpang ulcer. Ki dawai nitrates, ia kiba ju dih na ka bynta ban pynïar ïa ki tyndong snam, ruh ki pynaram ïa kita ki oesophageal sphincter, da kaba kyntiew ïa ka kabu ban jyreh ruh.
Ban sngewthuh ïa ka tynrai ka jingsuh kpoh, u doktor u lah ban phah leh ïa ki test kum ka jingleh test endoscopy, ha kaba ïa u tyndong jri ba jem bad rit la pynrung shapoh kpoh na ka bynta ban bishar ïa ka jinglong ki bynta ba shapoh ka kpoh, lane ka ultrasound, X-ray lane CT scan. Bunsien, wat lada, kita ki mawjam kiba suk ki long kiba la biang eh na ka bynta ban teh lakam bad kane ka jingshitom:
* Kiar na ki jingbam ba pynjur ïa ka jingshitom: Ki jingbam ba sat, jingbam sdieh lane ki jingbam ba long khleiñ, ki chocolate, rynsun, piat, ka kiad bad caffeine ki dei kita ki jait jingbam ba donkam ban kiar haba don ka jingshitom na ka jingbym tylliat bha ka kpoh lane ka jinglong dap lyer bad suh kpoh.
* Wat bam miet palat: Ban kiar na ka jingthut jong ka kpoh ka long kaba donkam ban kynmaw ban ym pynmlien ban bam miet palat ha ka por thiah ne mynmiet lane ban bam sted palat.
* Bam kham duna: Bam khyndiat ne kat ban biang bad sa bam pat bunsien.
* Pynduna ïa ka jingkhia: Kumba la tip ba ka jingkhia ne ka jingsngaid palat ka long kawei na ki jingeh ba kongsan ha kane ka juk kaba mynta, ha kaba shibun ki jait jingpang ba shyrkhei kum ka jingpang klongsnam, jingpang shini bad kiwei kiwei ki don bynta na ka daw jong ka jingkhia ne jingsngaid palat pud, kumta ka long kaba donkam ban teh lakam ne pynduna ïa ka jingkhia bad jingsngaid palat pud.
* Pynkynjang ïa ka syngkhlieh: Rah ïa ka khlieh kham shajrong lane syngkien da ki syngkhlieh ba kham jrong ha ka por thiah mynmiet khnang ban ïada na ka jingjyrheh ne mih la acid shabar ha ka bor mynmiet ne por thiah.
