Ki bym pat pynïasoh Aadhar kin duh lut ïa ki skhim khaw reshon, 100 sngi bad ïing baduk

Shillong, Jylliew 29 : U Myntri Rangbah ka Jylla, Conrad K Sangma u la ong ba ka sorkar India ka la ailad haduh ka 30tarik mynta u bnai Jylliew ïa ki paidbah ka jylla ba kin pynïasoh noh bad u Aadhar na ka bynta ban ïoh ïa bun ki skim kiba wan na ka sorkar pdeng.
Haba kren ha ka jingïalang jong ka CM Connect ha Mawkdok dang shen, u Myntri Rangbah u la ong ruh ba ki don bun ki skim jong ka sorkar pdeng kiba ai jingmyntoi ïa ki paidbah ka jylla ba kynthup naduh ka skim 100 sngi lane ka MGNREGA, nangta ka skim kyrshan bai sumar ba tip kum ka MHIS bad kumjuh ruh ka skim khaw rashon lane NFSA nalor bun kiwei kiwei.
“Nga kwah ban ïathuh ïa phi ba ha baroh kawei ka ri, ka Meghalaya kadei tang ma ka, ka jylla kaba ym pat pyndep ban pynïasoh pura bad u Aadhar. Baroh kiwei ki jylla ki la dep ban pynïasoh lut bad u Aadhar,” u la ong.
U Myntri Rangbah u la ong ruh ba u tip ïa ka jingsngew ba ki katto katne ki briew ki don haba ïadei bad u Aadhar hynrei u ong pat ba kine ki jingsngew kiei kiba lah ban pynshai bad pynsngewthuh ïa ki.
“Ngi lah da kaba suk ban pynshai halor u Aadhar bad ba ki jingsngew ba ki don ki dei lut kiba bakla,” u la bynrap shuh shuh.
Kumta, u ong ba kumba baroh kawei ka ri ka la dep ban pynïasoh pura bad u Aadhar kumta, ki nongshong shnong Meghalaya ruh ki dei ban pyndep ban leh noh.
“Ka sorkar India ka la ai por ïangi ba ha ka 01tarik Naitung, kaba mut 31tarik Jylliew kino kino ki bym don Aadhar ne pynïasoh bad u Aadhar kin ym ïoh pisa shuh na ka VEC, kin ym ïoh shuh ïa ki skim ïing ba duk (PMAY) bad kin ym ïoh shuh ïa ka skim khaw rashon (NFSA),” u la bynrap biang.
Shuh shuh u la ong ruh ba mynta la saw snem ka sorkar India ka la byrngem ban pynsangeh noh ia ki skim kiba dei na ka bynta kito ki bym pat pynïasoh bad u Aadhar. ‘Hynrei nga la ïai kyrpad man ka por bad kumta ki la pynjlan shi pynjlan haduh mynta da kaba ai por shi ai por man u snem,” u la ong.
Kumta, u ong ba mynta ka sorkar India kam treh shuh ban pynjlan por da kaba ong ba lada kiwei ki jylla ki lah ban pyndep ïa ka jingpynïasoh Aadhar balei ka Meghalaya kam lah.
“Kumta, nga kwah ban ong ïaphi ba na ka bynta kito kiba la don kyrteng ban ïoh ïa ka skim khaw rashon hynrei lada phim pat pynïasoh bad u Aadhar naduh ka 01 tarik Naitung phin ym ïoh khaw rashon shuh lane ka bainong trei na VEC bad phin ym ïoh shuh ruh wat ïa ka skim ïing baduk PMAY bad baroh ki skim jong ka sorkar pdeng,” u la ong.
Na ka liang u Myntri Rangbah u la kyntu jur ïa ki paidbah nongshong shnong ba ki dei ban pynstet leit pynïasoh noh bad u Aadhar shwa ban dier ka por khnang ba kin ym babe. U da kyntu ruh ba kim dei satia ban ngeit biej ïa ka jingdon kiba wan ban pynsngewthuh bakla shaphang u Aadhar.