Ki bym ngam jylliew ha ka 6th Schedule ki kwah ban pynduhnoh ïa ki ADC, ong u CEM

Shillong, Naiwieng 01: Ka Khasi Hills Autonomous District Council (KHADC) ryngkat ka JJM Nichols Roy College ha ka sngi Thohdieng ki la rakhe ïa ka lyngkhuh sngi ïap kaba 65 snem jong u Rev JJM Nichols Roy ha phyllaw jong ka District Council ha kaba ia kane ka prokram la pynlong da ka Rev. JJM Nichols Roy Memorial Committee.
Ha kane ka jingrakhe la long kongsan da u CEM ka KHADC u Bah Pyniaid Sing Syiem bad u Symbud kongsan u Bah P N Syiem Depty CEM ka KHADC. Haba kren ha kane ka sngi na ka liang u Bah Pynïaid Sing Syiem u la ong, “Ngi ïoh ïa ka Autonomous District Council na ka sorkar India ha ka snem 1952 lyngba ka jingiohi jngai jong u Rev JJM Nichols Roy, bad myna ngi don haduh 10 tylli ki Autonomous District Council ha North East. Ngi don ruh ïa ki District Council Act ha ki state jong kiwei ki jylla. Kine ki 10 tylli ki Autonomous District Council ki dei kiba hab hapoh ka sixth schedule hapoh ka Constitution jong ka ri India bad ha u snem 1959 u Rev JJM Nichols Roy ula khlad noh bad ha kine ki 65 tylli ki snem ngi ïoh ïa ka jingkyrkhu ba ngi don ïa ka District Council”.
Na ka liang jong u, u la iathuh ba tang kiba don ha District Council ki sngewthuh kiei kita ki bor ki iktiar jong ka sixth schedule. Ki paidbah ki bym ngam jylliew ha ka sixth schedule ki lah ban kren bun jait bad ki la ban kynthoh haba bun rukom ïa ka sixth schedule wat la ka don la ka iktiar kaba khlaiñ.
“Ïa ngi kiba trei bad pyrkhat jylliew kaba u Rev JJM Nichols Roy u la ai ha ngi ka dei ka kambah kamsan, wat lada im don shuh, ka dei ka kamram jong ngi ban kynmaw ïa u namar u la nohsynniang shibun ïa ka District Council bad kumjuh ïa ka sixth schedule,” ong u CEM.
U CEM u la bynrap da kaba ong, “Lada ngi peit ïa ka sixth schedule ha baroh ki paragraph ka long ka jingkyrkhu namar la ai bor ïa ngi ki Autonomous District Council ban shna aiñ, hynrei ha kine ki sngi ka la don ka jingshah ïalam bakla naba ka la mih ka kyntien ban ong ym donkam District Council shuh bad ngan iathuh haphi ba tang ban wanrah amendment ruh shim por 73 snem, katban ïoh ïa ka aiñ ba thymmai ym tip shuh ha Parliament mano ban sngap ïa ngi.”
Na ka liang u Deputy CEM ka KHADC u Bah Pynshngaiñ N Syiem u la ong ka long shisha kaei kaei kaba hap ñiewkor bad sngew burom ïa une u rangbah u Rev JJM Nichols Roy halor ki kam ba ratbah ba u la leh na ka bynta ka jaitbynriew.
“Ha u snem 1972 la pynsniew dur ïa ka jingïohi jngai jong une u rangbah ha kaba ïa ka ktien ban pynlait na ki aiñ jong ka sorkar pdeng kaba dei tang ha ka bor jong u Lat la aibor noh ïa u President jong ka ri India. Kaba mut la ai noh ïa ka iktiar kaba khlaiñ na ka kti ka KHADC ha u President ka ri India. U President jong ka ri India um hab ha ka jingpynïaid jong ka council jong ka sorkar Meghalaya hynrei u hab ha jingpynïaid ha ka kynhun ki Myntri jong ka sorkar India. “Ngi la duh ïa ka kaei kaba U Rev JJM Nichols Roy u la buh ïa ka thong ka bynta jong ngi,” u la ong.
Shuh shuh u la ong ban wanrah ïa ka District Council kaba skhem donkam ban wanrah ïa ki aiñ ba khlaiñ. “Ngi ki briew kiba don ha District Council ngi dei ban long kiba ïar ha ka jingmut jingpyrkhat ban wanrah ïa ki aiñ ba khlaiñ bad ki rukom treikam kiba khlaiñ.
“Ngi dei ban pyndonkam biang ïa ki mat kiba u Rev JJM Nichols Roy u la wanrah bad ïohi jngai ïa ka District Council,” ong u Bah P N Syiem da kaba bynrap, “Nga ngeit ba ka jingwanrah ammendment ïa ka 6th schedule kan wanrah jingmyntoi ïa ka jaitbynriew bad khamtam ïa u Rev JJM Nichols Roy.
Na ka liang u Bah PN Syiem Deputy CEM u la pynpaw ba um don ka jingartatien ba dei ban burom ïa une u Rangbah. “Ka 224 sub a bad ka 6 schedule kadei ka atiar kaba khraw bha naba kadei ka constitution hapoh ka constitution,” ong u Bah Syiem.
“Hynrei kaba sngewsih ka long ba hapoh ka ammendment jong ngi la pynsniew dur ïa kane ka khyrnit namar ka jingbakla jong ngi ban exempt ïa ka central laws ka jingpyrshang ban bsuh ïa ka para 12 a, ngi pynpra ïa ka kynroh barit bad plie lad ïa ka Sorkar India ban tuklar ïa ngi,” u la ong.
U la ong ruh ba shisien ba la sloit ïa ka iktiar ka ADC, kan plie lad ïa ka Sorkar India. Kumta kane ka ammendment mynta kan wanrah biang ïa ka bor ban exempt ia ka bor jong u Lat ban tuklar ïa ki ADC naba ha ka amendment ka la don ka jingpyllait noh ia ka bor jong u Lat ban ïada ïa ka jylla jong ngi donkam ïa ki ain ba khlaiñ. Nga sngewkmen ba kane ka EC ba mynta hapoh ka jingïalam u CEM ba mynta ka la thaw bun ki aiñ. Ngi ngeit skhem ba kane ka ammendment ba mynta kan pynkmen ïa u Rev Nichols Roy bad ban wanrah biang ïa ki jingïohi jong u.”
La pynïaid ïa ka jingïalang da u Chairman ka Rev. JJM Nichols Roy Memorial Committee u Bah Ransom Sutnga bad jingai khublei na u Secretary u Bah H S Suting. Ha kane ka sngi la pynlong ruh ka jingleit buh syntiew ha u mot jong u Rev JJM Nichols Roy.