Ki Balang bad ki skul ki dei ki shlem ba kongsan ban hikai ïa ka jinglehkhuid: Pastor B. Thongni

Nongstoiñ Rymphang 03: Ka jinglehkhuid ka long kaba donkam haduh katta katta ha ki ïng ki sem, ki shnong ki thaw, ki skul bad ha baroh ki liang. Kumba ka long mynta lajan baroh ki nongshong shnong ki la sdang ban sngewthuh ba ka jinglehkhuid ka donkam ym tang ïa ka met ka phad, ka bam ka dih, ka kup ka sem hynrei wat haduh ki jaka ki puta, ki lynti synkien bad ha baroh ki liang.
Kum ban pynkynmaw ba naduh ba ka sorkar pdeng ka la sdang ban pyntrei kam ïa ka Swaach Bharat Mission ka jingjaboh jong ki sawdong sawkun ha ki shnong ki thaw ka la duna shibun. Wat la katta ruh ki dang don ki jaka ba ki don ki nongshong dukan harud surok kiba die umdih, bad ki khutia mutia kum ki kwai dong, shana bad kiwei kiwei ki jait jingdih kum harud ka surok Shillong Nongstoiñ naduh Pamphyrnai haduh Upper New Nongstoiñ ba ki rud surok ki dap da ki jaboh kum ki bilor um ba la shu bret pathar, ki plastic song jingbam khutia bad kiwei kiwei.
Wat la ki briew kiba ju tam bilor kim ju pep man ka taïew hynrei ki plastik bad ki bilor um, bilor kyiad ki dang jyllei bha.
Ha kaba ïadei bad ka jinglehkhuid u Pastor B.Thongni uba dei u nongseng jong ka Mount Hermont Higher Secondary haba ïakren bad u nongthoh khubor u la ong ka jinglehkhuid ka dei kawei ka mat ba ki nonghikai ha katei ka skul ki la ïaleh katba lah ban hikai ïa ki khynnah ba kin ñiewkor bad kin ïaleh katba lah ban pynlong ïa ki sawdong sawkun jong katei ka skul ba kan lait na ka jingjaboh.
Ha kajuh ka por la lap ba katei ka skul ka la don ruh ïa ki paiñkhana kiba la bit la biang bha. Nalor kata utei u Pastor u la ong ba naduh ba la sdang ban seng ïa katei ka skul la ju hikai ïa ki khynnah ym tang ba kin ñiewkor ïa ka jinglehkhuid hynrei ba kin nang ban burom ïa ki kmie ki kpa, ki hynmen ki para bad ïa kiba kham halor. Nalor kata la hikai ruh ba kin long kiba don akor ha ka ïaid ka ïeng ka kren ka khana naduh na ïng haduh habar.
Nalor kata u la ong ruh ba ha kine ki sngi ka la don kam haduh katta katta ïa ki nongïalam jong ki kynhun Balang bapher bapher ba kin hikai ïa ki paidbah jong ki balang ba kin pynsngewthuh sha ki paidbah jong ki Balang ba ki dei ban kheiñ kor. U la ong ruh ba ka Ktien u Blei ruh ka hikai bad ka ong, “To long phi kiba khuid kumba nga nga long uba khuid.”
Ha kajuh ka por u la ong ban ai jinghikai tang shaphang ka bneng bad ka dujok kam don jingmut shuh ïa ki khristan ha kane ka juk kumta ka la donkam ban pynsngewthuh ba kin long kiba khuid naduh ka jinglong ba shapoh haduh habar.