Shillong, ïaïong, 22: Ka Sorkar India lyngba ka ophis District Social Welfare Officer, East Khasi Hills District kan pynlong ia ka Assessment Camps hapoh ka skim kaba iadei bad ki briew ba duna ha ki dkhotmet ne ka Assistance to Disabled Persons for Purchase/Fitting of Aids/Appliances (ADIP) bad ki tymmen ki kro ba la palat 60 snem ka rta kaba hap hapoh ka skim Rastriya Vayoshri Yojana (RVY) ha baroh ki ophis Block hapoh ka East Khasi Hills District katkum ki tarik ba la buh.
Ka thong jong kane ka Camp ka long ban ai jingiarap ia ki briew kiba duna dkhotmet ban thied/pyndait ia ki tiar iarap na ka bynta jong ki.
Baroh ki nongshong shnong kiba dei hok ban ïoh ki lah ban iashim bynta ha kane ka rynsan bad ban wanrah ia ki kot ki sla badonkam kum ka syrnot kaba pynshisha ba duna ha ka dkhot met (40% shaneng), ka Aadhaar Card, ka syrnot kaba pynshisha ia ka jingïoh shibnai ka bym palat ia ka T. 22500 hajar bad ka dur passport na ka bynta ka ADIP Scheme bad ka Aadhaar Card, ka syrnot kaba pynshisha ia ka jingïoh shi bnai ba bym palat ia ka T. 15000 hajar bad ka dur passport na ka bynta ka RVY Scheme.
Na ka bynta ki tarik jong ki camp ha ki Block, ki paidbah ki lah ban leit sha ka website jong ka District ha www.eastkhasihills.gov.in.
