Ki Assam Rifles ki la ïakhun pyrshah ïa ki Kaikhlaw bad ïa u drok ruh, ong u Myntri sorkar pdeng

Shillong, Lber 25: U Myntri Khynnah ka tnat kam pohïing jong ka Sorkar Pdeng, u Nityanand Rai , u la ong ba ki shipai Assam Rifles, ki la long ym tang ki nongïada ïa ka ri na ki nongshiun kiba nabar, hynrei ki la long ruh ki nongïakhun pyrshah ïa ki kakhlaw, ka jingkhaïi drok bad kiwei kiwei de ki kam sniew.
U Myntri u la ong ïa kane haba kren kum u Kongsan ha ka lyngkhuh dap 187 snem jong ka Assam Rifles ha Shillong ha ka sngi Palei. U Nityanand Rai u la pynkup burom ruh ïa ki shipai kiba la ai ïa la ka jingim na ka bynta ka ri. U Director General ka Assam Rifles, Lt Gen P.C. Nair, ki ophisar bad ki shipai ka Assam Rifles ha ryngkat kiba haïing jong ki na kylleng ka ri ki la ïashim bynta ha kane ka jinglehkmen lyngba ka video conferencing.
Ha ka jingkren jong u, u Nityanand Rai u la ong ba la seng ïa ka Assam Rifles ha u snem 1835 kum ka ‘Cachar Levy’. Ka Assam Rifles ka dei ka kynhun shipai kaba la ïoh khur bun tam ki khusnam gallantry hapdeng baroh ki kynhun shipai ha ka jingïaid lynti jong ka kaba la bun bun snem. Kane ka kynhun mynta ka long kaba la tbit bha ha ki kam ïada ri.
U Myntri khynnah ka tnat kam pohiing u la ong ba lyngba ka jingïaid lynti kaba jrong bha, ka Assam Rifles ka la nohsynniang bha sha ka jingpynthikna ïa ka shongsuk shongsain ha ka thain shatei lammihngi kaba la shah ktah ha ki kam lehnoh bad ruh ha Jammu & Kashmir bad ba ka la trei borbah ban ïada na ki kam khaii drok. Ka Assam Rifles ka dei ka kynhun kaba trei shibun ki jait kam, ka don ar tylli ki battalion ha Jammu & Kashmir bad kawei ka NDRF battalion kaba ai jingïarap haba ka don kano kano ka jinglynshop ka mariang. U Nityanand Rai u la ong ba u Myntri Rangbah Duh jong ka ri, u Narendra Modi u niewkor bha ïa ka bha ka miat jong ka ri bad jong ki kynhun shipai. Hapoh ka jingïalam jong u Myntri Rangbah Duh, ka Sorkar ka la shim shibun ki rai na ka bynta ka bha ka miat jong ki shipai bad ki longïing jong ki. U Myntri ka tnat kam pohiing, u Amit Shah u la ong ba ka Assam Rifles ka dei kaba ïada ia ka thain shatei lammihngi bad ka kynhun shipai kaba rim tam jong ka ri kaba dap da ki jingjop bad ka jingshlur. U Rai u la ong ba ka tnat kam pohiing ka la ai ia ka jingmynjur shipor ia ka jingseng sa san tylli ki battalion khnang ba ki shipai ki ïoh ia ka lad ban im hajan ki longiing jong ki ha ki jaka kiba ki sngewtynnad. Da kaba peit ia kane, ka Sorkar ka la pynkup bor ia ka Assam Rifles hapoh ka NDPS Act. Kane ka dei ka rai kaba la pyrkhat bha, bad lyngba kane, ka Assam Rifles ka la ioh kurup shibun ki mar pynbuaid bad ki drok kiba kot sha kumba T. 40 klur ha une u snem ba la dep.
U Myntri khynnah ka tnat kam pohiing u la ong ba da ka jingthmu ban kyntiew ia kane ka kynhun, mynta ka kam ka dang iaid ban thung kam shuh shuh ia ki shipai bad ban pyntbit shuh shuh ia ki. La pynlong ia ka jingpeit bniah ia ki shipai ha u snem 2003 bad kane kan iarap ban pynbiang ia ki jingdonkam jong ki katkum ka juk mynta bad pyntbit shuh shuh ia kane ka kynhun. U Rai u la ong ruh ba ka jingthmu ban pynthymmai ia ka Assam Rifles ka dei kaba la ioh jingmynjur bad mynta dang pyntreikam ia kane. Ha ryngkat kane, yn pynkhlain ruh ia ki jingdon jingem kiba iadei bad ki tiar ialeh katkum ka juk mynta, ka jingpyniasoh, ka jingpeitngor bad ka jingai jinghikai. U Rai u la ong ba wat hapdeng ki jingeh kiba wan na ka khlam COVID-19, kane ka kynhun ka la lah ban thung kam thymmai ia 5,192 ngut ki shipai. Ha ryngkat kane, ka jingthung kam sa ia 4000 ngut ki shipai ka dang iaid shakhmat.
U Nityanand Rai u la ong ba ka Assam Rifles ka la trei borbah ban pynthikna ia ka jingryntih hapdeng ki shynrang bad ki kynthei bad ruh ka jingpynkup bor ia ki kynthei kaba la wanrah ia ka jingthep kam haduh 1,187 ngut ki kynthei ha kane ka kynhun. U Myntri khynnah u la ong ba u dap da ka jingkyrmen ba ki kynthei kin dang kham bun katba dang iaid ka por. U la ong ba ka jingphah ia ka kynhun jong ki kynthei sha ka Democratic Republic of Congo ka pynkhlain ia ka jingthmu ban pynkylla ia ka India sha ka ri kaba donbor. Watla ka India ka la nohsynniang sha ka kam jong ka UN ban pynthikna ia ka jingshongsuk shongsain la bun bun snem mynta, ka jingdon jong ka kynhun Riflewomen jong ka Assam Rifles ka wanrah sa ia kawei ka bynta sha ka jingkut jingmut jong ka ri na ka bynta ka jingbha jong kiwei kiwei ki ri. Nga ai khublei ia baroh ki riflewomen kiba la pynurlong ia kane bad nga kyrmen ba kin trei kham bha ha kine ki por ban dang wan. Ka Assam Rifles ka donkam ia ka jingiaroh na ka bynta ki jingnoh synniang na ka bynta ka jingpynkupbor ia ki longkmie kaba paw shai lyngba ka jingtbit jong kine ki riflewomen.
U Myntri khynnah ka tnat kam pohiing u la ong ba baroh ki kyrdan jong ka Assam Rifles ki hap mad shibun ki jingeh na ka bynta ka jingshngain jong ka ri bad kumta ka bha ka miat jong ki ka dei kaba kongsan ia ka Sorkar. Ka la sdang ia shibun ki skhim kum ka e-Awas portal kaba pyni ia ka jingkut jingmut jong ka Sorkar ban pynthikna ia ka bha ka miat jong ki shipai. Ka sienjam ‘Bharat Ke Veer’ jong ka Sorkar ka la noh synniang kumba T. 5.57 klur naduh u snem 2016 sha ki longiing jong 44 ngut ki shipai kiba la aiti ia la ka jingim. Shuh shuh, khnang ban plié lad pule puthi ia ki khun jong ki shipai kiba dang trei bad kito kiba la shongthait, ka Sorkar ka la buh reservation ha ki jingpule MBBS / BDS ha katto katne ki jaka pule bad ki longiing jong ki shipai ki ioh jingmyntoi bha na kane.