Shillong, Nailar, 08: Ki nongïalam jong ka All Khasi Hills Achik Federation (AKHAF) ha ka sngi Palei ki la kyntait war bad kynnoh kylla ba ki arngut ki la shah bat ha ki dkhot ka seng ha Lad Bakli ki dei kiba donkti ban khaii masi tuh sha ka ri Bangladesh.
Kum ban shu pynkynmaw, ki arngut ki rangbah Khasi ha ka ejahar ba la mudui ha Nonghyllam Out Post ki la kynnoh ba ki la shah rahbor bad shah dawa pisa ha ki dkhot jong ka All Khasi Hills Achik Federation (AKHAF) ha Bakli ha ka 4 tarik, Nailar 2024 ha ka por 2:00 baje mynstep katba ki dang wan phai na ka jingleit buh briew sha Bakli South West Khasi Hills District bad ynda ki la poi ha Lad Bakli, kyndit kynsan kawei ka kali kaba don ïa u nombar ML-12, 3708 ka la kthong ïa ki nadien.
Kine ki arngut ki la kam ruh hadien ba ki la pynsangeh ïa ka kali, na katei ka kali la mih san ngut ki briew kiba kam ïalade ba ki dei na ka AKHAF ba la ïalam da u Vikesh D. Marak na ka shnong Bakli, Khonjoy, South West Khasi Hills District.
Nalor kata, ki arngut ki la kynnoh ba ki dkhot ka AKHAF ki la dawa pisa hynrei namarba kine ki arngut kim don pisa ki la shah shoh bad shah rahbor sha khlaw ryngkat ka jingshah byrngem byrsit bad ynda la shai ka bneng la pyllait noh ryngkat ïa ki lada lap biang ba ki wan sha katei ka jaka kin thang bad kali bad briew.
U General Secretary ka AKHAF u Manuel Ch Marak ha ka jingïakren bad ki lad pathai khubor u la ong ba ka jingkynnoh jong ki arngut ki rangbah Khasi ka long ka bym don nongrim bad ka dei ruh ka jingkynnoh lamler.
U la ïathuh ruh ba katkum jingtohkit jong ka seng na ki dkhot ka AKHAF na Khonjoy, Maheshkola, la kynnoh ba ki arngut ki rangbah ki la kam ïalade kum ki nongñiah kali kamai katba ki dei kiba thmu ban shalan tuh ïa ki masi sha Bangladesh. “Dei na kata ka daw kaba la pynlong ïa ki dkhot jong ka AKHAF ban pynsangeh ïa ki da ka jingpyrkhat ba ki dei ki nong Bangladesh kiba wan rung tuh shapoh India namarba ka dang don ka jingïaumsnam hapoh ka ri Bangladesh bad nalor kata, kam shym la la don satia kano kano ka jingjrong kti ïa ki arngut ki briew kumba la kynnoh,” la ong u Marak.
U la ong, lada ki don kino kino ki dkhot jong ka seng kiba ktah kti ïa ki arngut ki rangbah, ka seng kan nym ailad satia hynrei lada ki jingkynnoh pyrshah ïa ka seng da ki arngut ki rangbah kim dei kiba shisha, kan wanrah pynban ka jingsngewsih bad pynbudnam ïa ka seng da kaba pharep lamler.
“Kine ki jingpharep ki dei tang ka jingsngewthuh bakla bad ngi kyrpad ïa ki paidbah ba kim dei satia ban pynsaphriang ïa ki khubor lamler namarba ka lah ban ïalam sha kino kino ki jingjia ki bym sngewtynnad,” ong u Manuel Ch. Marak.
“Ngi kyrpad ruh ïa ki paralok jong ngi ba kim dei ban pynsaphriang ïa ki khubor ki bym dei namar lyngba ki khubor thok ki lah ban ïalam sha ki jingjia kiba sngewsih hapoh ka imlang sahlang,” la bynrap u Marak.
