Ki ar sorkar, ki dei ban thaw ïa ka scientific mining policy kaba ïahap bad ka riti bat khyndew

Shillong, Ïaiong 03: Ka kynhun ki nongtih dewiong jong ka ri lum Jaintia, kiba don hapoh ka shatri Jaintia Coal Miner and Dealer Association (JCMDA) kan pynlong da ka rally ha Khliehriat ha ka 7 tarik mynta u bnai ban pynbor ïa ka Sorkar Jylla bad Sorkar Pdeng ba kan thaw ïa ka scientific mining policy kaba ïahap kat kum ka riti bat khyndew bapher ka thain bad ka rukom long ki jaka.
“Ngi kwah ïa ka Sorkar Jylla ba kan ïakren bad ka Sorkar Pdeng ba kan pyntreikam ïa ka scientific mining kaba ïahap bad ka rukom leh ki briew jong ngi” ong u President ka Jaintia Coal Miners & Dealers Association Bah Borrin Shadap haba ïakren bad ki nongthoh khubor ha ka sngi Palei.
Shuh shuh u la ong, “Ka jingwan noh ka Ïingkashari Supreme Court ïa ka jingkhang tih dewiong ka dei ka sienjam kaba ngi pdiang, kaba pynskhem ïa ka hok jong ngi kum ki trai jaka hapoh ka Sixth Schedule” ula bynrap.
U dkhot ka JCMDA u Bah Sambormi Lyngdoh ula pynpaw halor ka jingsngewkhia ba ïadei bad ka mariang bad ki jingeh kiba ïatyngkhuh ha ka jingtih par da ka Open cast ha ri-lum Jaintia.
“Ka jingtih par Open-cast kam ïahap satia hangne, ngi donkam ïa ka policy kaba pyrkhat lang ïa ka rukom long ki jaka bad ka jinglong trai jaka” ong u Bah Sambormi.
Ka rally ka thmu ban kyrpad ïa ka Sorkar Jylla ba kan thung ia ka Committee ban leh sorjamin ïa ka rukom long ki jaka bad ban shna ïa ka policy kaba shimkhia ïa ka jingsngewkhia ki nongtih dewiong jong ki par barit baria.
“Ngi donkam ïa ka policy kaba treikam na ka bynta jong ngi, ym kaba pyrshah ïa ngi” ong u Bah Sambormi.
Kane ka seng kala khot sngewbha ïa baroh ki kynhun, kynthup ki nongtih dewiong, ki nongniah trok bad ki nongbylla ba kin ïasnohkti lang ha ka rally.
“Ngi kwah ban pyni ba ngi la kut jingmut shisha ban tih par da ka jingkitkhlieh, ym shuh da ka jingtih ba long beain” ong u Bah Sambormi haba bynrap “Ka por kala dei ïa ka Sorkar ban pynbeit ïa ki jingeh jong ngi”.
Na ka liang u Bah J Purtuh uba dei u MDC barim uba dei ruh u nongai buit jong ka JCMDA u la ong ba ha ri lum Jaintia ka jingtih dewiong kala kynjoh mynta la 50 haduh 60 snem bad kumba 90 % na ki briew ki im na kane ka kam.
Shuh shuh u la ong bay m don ki briew ki ban don jaka da ki spah akar, hynrei kumba 98 % na ki paidbah kidei kiba don tang kumba 4 ne 5 akar ka jaka bad ha East Jaintia tang khyndiat eh ki don kiba trei ha ki kam ophis bad naduh ba la khang ka NGT kala ktah shisha ïa ka ioh ka kot ki paidbah.