Ki aiñ ki kanun hapoh ka ri India kim long ïaryngkat, ka treikam tang ïakiba duk bad kiba biej ba them-Albert Maring (Umdap Dumu, Ri-Bhoi District)

Ki aiñ ki kanun hapoh ka ka Ri India kim long ïaryngkat, bunsien ngi iohi bad lap ba ka aiñ ka teh bad treikam tang ïa kiba biej kiba them, ba duna ka jingnang ka jingtip, kiba duk ba rangli, kiba tlot bor, katba kiba don haka bor ki iuh ïaka, kiba bat ïa aiñ ha kti ki pynkheiñ ïaka, ki shna ïaki aiñ ha kti bad ki pynkheiñ ïaki da kita ki briew kiba don haka bor.
Lada leh bakla pynkheiñ aiñ da ki briew kiba don ha ka bor bunsien, ki bor jong ka aiñ kim lah ban iohi, ki shkor jong ka aiñ kim lah ban ioh sngew i kumba ka kti ba jrong jong ka aiñ kam lah ban poi sha ki ban bat bad kem.
Ha kane ka rukom ka wanrah ka jingbym ryngkat ha ka hok long briew man briew. Hynrei katkum ki hok long briew man briew, ki hok tynrai (fundamental rights) ki kren shai ba u wei pa u wei ne kawei pa kawei ki nong shong shnong jong ka ri India ki don ka hok ban ïa ryngkat ha ki liang baroh khlem da thew shiliang khmat ia ka jingsngew pher ha ka niam, ka long kur long jait, ka jinglong kynhun jait bynriew, bad ban long laitluid ban im laitluid ha ki liang baroh ym dei ban don ka jing shah niew beiñ. Ka hok ban ia ryngkat (equality before law – article 14) ka hok ban kren bad ban pynpaw (Right to freedom, freedom of speech and expression-article 19).