Ki 9 snem ki jingsynshar ka BJP hapoh ka jingïalam u Modi ki long da ki jingkular thok suda : Congress

Shillong, Jymmang, 27: Ka Congress, ha ka sngi Saitjaiñ kala buh haduh 9 tylli ki jingkylli ïa ka sorkar BJP kaba bat ïa u lakam synshar ha ka sorkar pdeng halor ki kam kiba ka trei ha kine ki 9 snem, kata naduh u snem 2014 ter ter haduh mynta.
Haba kren bad ki lad pathai khubor, ka Bobbeeta Sharma kaba dei ka media coordinator bad vice president jong ka Assam Pradesh Congress Committee ka la ong ba kitei ki khyndai tylli ki jingkylli kiba ka party ka buh ïa katei ka party ba ïalam ïa ka sorkar ha ka Ri ki kynthup naduh ka bamsap, ka jingkiewdor palat lïam ki mar ki mata, ka jingkyrduh kam nalor kiwei kiwei.
“Ki paidbah ka Ri ki kynmaw ia ka jingkular jong u Modi ia kitei ki sngi babha ban ai 15lak ha ki bank account jong baroh ki nongshong shnong ka Ri, ban ai kam 2 klur ngut sha ki samla bym donkam donjam bad bun kiwei kiwei,” ong ka Bobbeeta.
Shuh shuh ka kynnoh ruh ba ki paidbah ka Ri ki ngeit ia u, ki shaniah hynrei u Modi u la shet kylla ia ka jingshaniah jong ki. “Hynrei ka sorkar jong u ka la iaid da ka bamsap, ka jingkiewdor ki marbam mardih, ka kyrduh kam kyrduh jam..” ka la ong.
Ka buh jingkylli ruh ba kumno ka jingkiewdor bad ka jingkyrduh kam kyrduh jam ki kiew palat pud ha ka Ri. “Balei u khaw u la nang rem bad uba duk u la nang duk?”
La buh jingkylli ruh halor ka jingshngain ka Ri haba ïadei bad ka jingbteng kyntur pud ka China ha u pud u sam jong ka India. Katkum ka jingong jong ka, ki la don haduh 18 sien ka jingkynduh bad ka China hynrei ki dang bteng ïa kitei ki kam.
Kawei pat ka mat ba katei ka heh Congress ka kynnoh ka long ba la pyrshang wanrah da ka politik jingisih hynrei sngap jar pat haba ïadei bad ka jingshah thombor ïa ki rit paid, ki SC, ST bad OBC. “Balei phi pyndonkam ïa ka politik ban pynhiar kput ïa ki party liang pyrshah bad ïa ki nongïalam jong ka,” ka la ong.