Ki 3 tylli ki jylla ki don ka bynta kaba khraw ban noh synniang ïa ka roi ka san jong ka ri, ong u Lat

Shillong, Lber 30: Ka Lok Bhavan ha ka sngi Nyngkong ka la rakhe ïa ka sngi ïoh jylla jong ka jylla Bihar, Rajasthan bad Odisha da ki prokram ba kyrpang kaba la pynlong ha Durbar Hall Shillong.
Kane ka prokram la sakhi da ka jingdonlang ki ophisar jong ka sorkar, ki samla pule college, ki nongshong shnong ba la shah khot sngewbha bad kiwei kiwei. Ki la don ruh ki Cultural prokram ba kynthup ïa ki jingshad deiriti na ki lai tylli ki jylla, kiba la pyni ha kane ka jingrakhe kaba kyrpang.
Haba kren ha ka prokram u Lat ka jylla u C. H. Vijayashankar u la ai ka jingkhublei sha ki nongshong shnong jong kine ki lai tylli ki jylla bad pynpaw ïa ki jingriewspah ki jinghiar pateng ki kolshor, ki khana pateng bad ki niam tynrai jong ki. U la ïaroh ruh ïa ki artist kiba la shim bynta halor ki jingaiti jong ki, da kaba kdew ba ki jingshad tynrai jong ki, ki pynphalang ym tang ïa ki jingaiti jong ki riew shimet hynrei kumjuh ka jingithuh ïa ki jinglong ki jaitbynriew ha la ki jong ki jylla jong ki.
U Lat u la batai ba kane ka prokram ka dei ka lad ban pynpaw ïa ki jingnoh synniang ba kongsan jong ka jylla Bihar, Odisha bad Rajasthan sha ka ri baroh kawei. U la kdew ba ka Bihar la slem ka la ïoh ka nam burom kum ka pdeng jong ka jingnang jingtip, bad ka jingdon ki jaka pule kum ka Nalanda University. Katba ka Odisha, u la ong ba la tip bad bna nam kum ka jaka ki kam mynsiem bad ki jingtei ba pawnam kum ka Jagannath Temple bad ka Konark Sun Temple, ha ryngkat bad ki tamasa kiba kyrpang bad bapher, u la bynrap ba ka Rajasthan ka ïeng halor ki jinglong shlur, ki grand fort bad ki palace, bad ki jingriewspah ha ka kolshor na ka jinghiar pateng.
Haba banjur ïa ki jingdon ki jingpher ba bun jait jong ka India kaba la wanrah ïa ka bor kaba khraw, u Lat u la ong ba hapdeng ki jingïapher ha ki ktien bad ki kolshor, ka ri ka ïaineh ha ka jingïalong kawei. U la phai ruh sha ka jingïohi jngai jong ka Ek Bharat Shreshtha Bharat.
U la pynpaw ka jingsngew skhem ba kine ki lai jylla kin bteng ban noh synniang sha ka jingkiew ka roi ka san ha ka ri bad pynpaw ka jingkwah kaba bha ba ki nongshong shnong kine ki jylla kin bha kin miat ha ki jingim jong ki kiba manla ka sngi lyngba kine ki jingrakhe jong ki ïa ka jingïoh ïa ki jylla jong ki.