Ki 22 tylli ki shnong ha Block II ki hap sha Assam, ka Meghalaya ka dang ïakhun ban ioh biang : Prestone

Nongpoh, Nohprah 15: U Bah Prestone Tynsong Symbud Myntri Rangbah ka jylla mynta ka sngi u la kren shai ba ki 22 tylli ki shnong ha ka thaiñ Block II ki hap sha ka jylla Assam bad ka sorkar jylla mynta ka dang don hapdeng ka jingïakren ban ioh biang ïa kitei ki shnong sha Meghalaya.
Haba buh jingkylli halor ka jingbteng jong ka Assam ban kyntur pud haduh mynta ha ka shnong Umsaw Lum Dorbar kaba ki paidbah bad nongïalam shnong ki don hapdeng ka jingshong syier, u Bah Prestone u la jubab ba ha ka jingïakynduh bad u Amit Shah dang shen la kren shai kdar ba ym pat lah ban pynbeit ïa u pud u sam bad ba un bthah ïa ka jylla Meghalaya bad Assam ba kim dei ban pynthut ïa ka ïaid ka ïeng bad ka trei ka ktah jong ki paidbah bad ruh ban buh ïaki bor pulit lane shipai ban pyntieng pynsmiej ïaki paidbah.
Kane kadei hadien ba ki pulit Assam ki la bteng ban pynibor bad ban thwet ruh wat ïa ki nongïalam shnong, kaba dei hadien ba ka jingker sainar ka Assam ba la wan kyntur pud sha ka khlaw shnong ka Umsaw Lumdorbar la shah pynpra noh ha kine ki khyndiat sngi haki paidbah.
U la ong ruh ba ki Deputy Commissioner bad Superintendent of Police jong ka Ri-Bhoi bad kumjuh ruh ki DC, SP na Karbi Anglong Assam ki dei ban don ka jingïasngewthuh jingmut bad la shaniah ha ki ïa ka kam. Hynrei, u ong pat teng teng tang na ka kam shimet ka mih ka huri hura, la ki dei ki briew na Assam ne Meghalaya. Kumta u la kyrpad ïa ki Dorbar Shnong ba ki dei ban tehlakam ïa ki nongshong shnong ba kim dei ban pynmih kano kano ka huri hura.
Ha kaba ïadei bad ka jingshah thwet jong ki paidbah bad ki nongïalam shnong ha ka shnong Umsaw Lum Dorbar ka thaiñ Block II u Bah Prestone u la ong ba ka dei ka kamram jong ka aiñ ba kan leh ïa kaba donkam hynrei kim dei pat ban leh palat pud ïaki briew jong ngi.
Shuh shuh u la pynshai ruh ba ka jingïakren mynta ïa kitei ki 22 tylli ki shnong ym dei shaphang ka jingïapher ne ka jingkajia pud hynrei ban pynphai biang ïakitei ki shnong sha ka jylla Meghalaya.