Shillong, Rymphang 16 : U Dr Mukul Sangma uba dei u Nongïalam ka Liang Pyrshah hapoh ïing Dorbar Thawaiñ ka jylla u la khyrwit tyngeh ïa ka sorkar jylla kaba tuklar ïa ka synshar khadar ha Garo Hills Autonomous District Council da kaba u kynnoh ba ka la pynkheiñ ïa ka iktiar jongka bad pynkheiñ ruh ïa ka Sixth Schedule jongka Constitution.
Haba kren halor ka jingpynkhreh jongka TMC ia ka Election MDC sha ka GHADC u la ong “ Ngi don ha madan bad ki briew bad ngi la ïoh sngew ba ki briew ki la duh jingshaniah bad ha kane ka Executive Committee ba mynta.
U la kynthoh pyrshah ruh halor ka jingrai ka sorkar ban pyllait tulop ïa ki nongtrei ka GHADC da kaba kynnoh ba kane ka dei ka jingmuslia ïa ka bor synshar ka GHADC.
“ Ka dei ka jingpynkheiñ bor bad iktiar jongka Council kumba la pruid dak ha ka Sixth Schedule jongka Constitution” ong u Dr Mukul.
U la ong lada kane ka jia ha GHADC ka juh kan sa jia ha KHADC bad JHADC ruh. “ Ka la dei ka por ba ki paidbah kin ïeng pyrshah halor kane” ong u Dr Mukul
U la ban shuh shuh da kaba ong ba ki District Council ki dei jong ki paidbah ym dei jong ki seng saiñ hima sima. “ Baroh ki jingpruid dak ha ka Sixth Schedule la pynkup bor ba kan long kum ka stieh ban ïada ïa ki trai ri trai muluk, ïa ki riti ki dustur khamtam ïa ki paid Khasi, Garo bad Jaintia kiba rit paid bha.
U la kynnoh ba kane ka jingleh jongka sorkar ka la pyntlot bor ïa ki District Council.
Halor ka jingpynkhreh ïa ka election u la ong phin sa tip shen, namar un ym sei bad buh lypa ïa ki Kad halor ka miet namar ka politik ka long kaba jylliew bha.
U la ong ka saiñ pyrthei ka la kylla bad donkam ban ban ïaid da ka lynti kaba dei ban ïaid. Ka la long kum ka jingïalehkai behmrad bad kiwei kiwei ki bor.
