Khyrwit u Bah Sanbor sa ïa u Bah Hek, yn ïakynduh markhmat ïa u Conrad bad Metbah

Shillong, Naitung 09: U Bah Sanbor Shullai, MLA ka BJP, mynta ka sngi,u la khyrwit sa ïa u Bah AL Hek,u para MLA na ka Seng BJP, da kaba pynrem jur ïa ka jingkren jong u ha ki lad pathai khubor halor ka jingjia ha ka sngi ba wan ka kyrtong President ha Orchid Hotel ha ka 6 tarik mynta u bnai.
Ha ka jingpyllait khubor na ka jingleit donkam jong u sha Kolakata, u Bah Sanbor u la dawa ba u President ka BJP Meghalaya ban pynshitom ïa u, namar i kumba u kyrshan ïa ka jingkren pyrshah ïa ka Seng BJP. “Lada u Bah AL Hek, bad kiwei ki sngew ba ka BJP ka dei ka seng pyrshah Khristan, balei pat ki don bad ïatreilang bad ka BJP”, la ong u Bah Sanbor.
Halor ka jingjia ha ka 6 tarik ha ka por ba wan ka kyrtong President ka Draupadi Murmu, u MLA ka South Shillong, u la ong ba kadei ka jingjia kaba um shym poi pyrkhat, hynrei kadei pat kaba la shu pynheh da u Bah Hek. “Ngan sa ïakren markhmat bad u Myntri Rangbah, u Conrad Sangma bad kumjuh ruh ïa u Speaker, u Bah Metbah Lyngdoh, ynda nga la wan phai na Kolkata”, u la ong, da kaba ong ba un sa panmap ruh lada kane ka jingleh jong u, ka la ktah ïa kito kiba don ha kane ka jingïalang.
Shuh shuh u la ong ruh halor ka jingpynpaw u Bah Metbah Lyngdoh hakhmat ka Murmu ïa ka jingshah thombor ki Khristan, ym dei ban kynnoh tang ïa ka BJP bad ba kam dei ka jaka ruh ban rah ïa kane ka mat ha kum katei ka jingïalang. Ka kyrtong President ka wan shane ban wan pan jingkyrshan na ka bynta ka elekshon President bad ban rah ïa kine ki mat hakhmat jong ka, ka long ka bym ïahap satia.
Ha kajuh ka por une u Myntri ka sorkar jylla, u la kam ruh ba u ju ïeng pyrshah ïa kino kino ki jingthombor ïa ki Khristan kum ka jingshah kem u Fr. Stan Swammy bad kiwei kiwei.
U la ong ruh ba u don ka jingïadei kaba jan bad ka NPP naduh ka por ba dang don u (L) Purno A. Sangma.