Guwahati, Nohprah 6 : Ka Congress ha Assam kala pynrem jur ïa ka rai jong ka Sorkar BJP ha Assam ban khang bam doh masi ha baroh kawei ka Jylla bad kynnoh ba u Myntri Rangbah ka Jylla Himanta Biswa Sarma bad ka BJP kila jam palat ïa u pud kaba ktah ia ka hok laitluid ba shimet bad ka dustur jong ki nongshong shnong.
U President ka Congress Bhupen Borah ula ong ba ka Congress Party ka ju ïeng skhem ha ka nongrim ka jingïalong kumjuh, jinglaitluid bad burom ïa ka dustur jong baroh kumba la pruid dak ha ka riti synshar ka Ri. Ula pynrem ïa ka sienjam jong ka Sorkar namar ka jingpyrrkhing ïa ka mon shimet ki briew.
“Ka Sorkar kam dei ban hukum da kaba bor ïa kaei kaba ki briew ki dei ban bam, ban phong lane kumno ba kin leh ïa la ka jong ka jingleh tynrai. Baroh ki nongshong shnong ki don ïa ka hok tynrai ba la pynkup bor da ka Riti Synshar ka Ri ban shim ïa ka rai shimet shimet” ong u Borah.
U Borah ula pynrem jur ïa ka BJP bad RSS kiba la pyndonkam ïa ka jingmane ïa ka Masi kum ka atiar saiñ pyrthei ban pynbor ïa ka jingngeit jong ki sha kiwei pat. Haba burom ïa ka jinglong kongsan ka masi ha ka niam Hindu, ula ong “Ka BJP bad RSS ki lah ban kren halor ka Gau Mata, hynrei ka dei kaba bakla ban pynbor ïa kiwei ba kin bud ïa ka rukom leh jong ki”.
Haba kyntait ïa ka jingkop u Himanta uba ai jingmut ba lada ki Nongïalam ka Congress ki la sangeh ban bam doh masi, ka BJP kan sa le lang kumjuh, u Borah ula ong “Hato la khmih lynti ïa nga ban rai kaei kaba u Himanta Bisaw Sarma u bam, u phong bad kumno u rakhe ïa ka Bihu? Ka jinglong nongïalam ka dei ïa ka synshar khadar, ym ban pynïaid ïa ka jingim jong kiwei”.
Ha ka 4 tarik Nohprah, u Himanta ula pynbna ban khang noh ïa ka jingbam doh masi bad ai doh masi ha ki jaka paidbah. “Naduh mynta, ïa ka doh masi ym dei ban ai shuh ha kino kino ki restaurant, hotel lane ki jaka ïalum paidbah” ula ong.
