Shillong, Nailar 12 : Ka hat-trick jong u Manbha Ïawphñiaw ka la pynlong ïa ka Mawlai SC ban pynliem suk da 6-1 kol pyrshah ïa ka Malki SC ha ka jingïalehkai jong ka lympung OC Blue Shillong Premier League (SPL) 2021-22 ha ka sngi Thohdieng ha madan Third Ground, Polo, Shillong.
Katei ka dei ruh ka jingïalehkai kaba nyngkong ha kaba u Ïawphñiaw un thep ïa ka hat-trick kaba nyngkong mynta ka samoi. Kadei ruh ka sien kaba nyngkong mynta ka samoi ban thep haduh hynriew kol bad kaba nyngkong ruh ba ka Mawlai kan shah pynphai kol ha ki phra sien ki jingïakhun.
Nalor u Ïawphiaw kiwei kiba la ïarap thep kol ki kynthup ïa u Nikelson Bina, Samuel Lyngdoh Kynshi bad u Donlad Diengdoh, katba u Marchsterfield Marbaniang u thep shi kol na bynta ka Malki.
Ha ka lg kaba nyngkong kitei ki ar tylli ki club ki la dep ban ïakhun ha ka 9 tarik Naitung ha kaba ka Mawlai SC ka la pynliem da 4-0. Haba mih madan ha ka sngi Thohdieng, ka Malki ka don ha ka kyrdan kaba ar na sha trai da kaba kamai 4 point katba ka Mawlai ka don ha ka kyrdan ba nyngkong da kaba kamai 19 point.
Ha katei ka jingïalehkai ka Malki ka la pynkylla katto katne ki rangïalehkai ha ka kynhun jong ki khatwei ngut. Ka jingïalehkai hapdeng kitei ki ar tylli ki kynhun ka slem khyndiat minit hadien ba u Kordor Dkhar u la mynsaw bad la pynkit noh mar mar ïa u da ka ambulance sha ka jaka ai jingsumar.
Hadien ba la sdang ka jingïalehkai ha ki 16 minit kiba shakhmat, ka Mawlai ka ïoh thep saw kol.
Ka Mawlai ka la sdang ban plie pyrda nyngkong lyngba ka kol ba la thep da u Manbha Ïawphñiaw ha ka minit ba 24 jong ka jingïalehkai shwa ba u Nikelson Bina un thep ïa ka kol kaba ar ha ka minit ba 26.
Lyngba kitei ki ar kol ka la nang pynskhem bad ai mynsiem shuh shuh ïa katei ka kynhun kaba khlaiñ tam mynta ka samoi ha ka lympung SPL. Ki rangïalehkai ka Malki ki la ïakhun tyngeh ban pynphai kylla hynrei ki khlem lah ban pyndep ha ka liang ka thep kol.
Katba ka jingïalehkai ka dang ïaid shakhmat, ka Mawlai ka la nang ñion sha ka kut jong ka Malki bad khlem da ailad ki la ïapashat bol ha ka rukom kaba itynnad bha. Lyngba katei ka rukom ïalehkai ka Mawlai ka la ïoh biang ban pynkhih jar ba la thep da u Donlad Diengdoh ha ka minit ba 40 bad haduh ba kut ka kylla step ka Mawlai ka la lamkhmat da 4-0.
Haba wanphai sha ka jingïalehkai jong ka kylla miet, ka Mawlai ka la nang ïakhun tyngeh bad ym hun tang ki saw kol ha kaba ka la nang pynskhem shuh shuh bad ha ka minit ba 58 u Manbha u la thep sa ïa ka kol kaba ar na bynta jong u bad kaba san na bynta ka Mawlai.
Ka jingïakhun hapdeng kine ki ar tylli ki kynhun ka kham khlaiñ shilliang ha kaba ka bol bun ba ka don beit sha ka liang jong ka Malki, bad dei ha ka minit ba 74 u Manbha Ïawphñiaw u la thep ïa ka hat-trick kaba khlem pynartatien eiei shuh ïa ka kynhun ban khur ïa ka nam jop.
Ka Malki SC tang ban lait ka leit phai thylli ka la ïoh ban thep shi kol lyngba u Marchsterfield Marbañiang ha ka minit ba 86 jong ka jingïalehkai hynrei haduh kaba kut kam shym la lah shuh ban pynphai kol ha kaba ka Mawlai SC ka la khur ïa ka nam jop.
Lyngba kane ka nam jop, ka Mawlai SC ka dang ïai bat kyrdan ba hakhlieh duh da kaba kamai 22 point na ki phra sien ïalehkai katba ka Malki SC ka dang neh ha ka kyrdan ba hynñiew na sha trai ka miej kheiñ point.
Ka jingïalehkai SPL kan long biang ha ka 18 tarik Nailar ha kaba ka jingïalehkai hapdeng ka Mawlai-Nangkiew Irat kaba la pynsangeh noh na ka 4 tarik Nailar kan sa long ha katei ka sngi ha ka por 4 baje janmiet.
