Shillong, Nailar 20 : Ka kynhun jong ki longkmie NPP ka Jylla hapoh ka lama jong ka National People’s Women Front (NPWF) ha ka janmiet sngi Balang ki la leit jngoh ïa ka khynnah kynthei kaba la shah dung da u thyrnia injekshon ha ki runar katba ka dang ïaid lynti ha Jaïaw.
Ha kane ka jingleit jngoh ïa kane ka khynnah kaba dang don mynta ha ka jaka sumar la ïalam da ka President jong ka NPWF Kong Grace Kharpuri kaba dei ruh ka MDC jong ka Nongshken, nangta ka Working President jong ka Khasi Hills, Kong Biolinda L Nonglait, ka National Vice President ka NPWF Kong P Nongpluh bad ruh ka District President East Khasi Hills Kong Damelari Ryntathiang.
Na ka liang ka National People’s Women Front ka la ïoh ban ïa kren kane ka khynnah bad kumjuh ïa ka kmie jong ka bad ai ruh ïa ka song jingïarap sha kane ka longiing.
Na ka liang ka President haba kren bad ki lad pathai khubor ka la ong ba ki kyrpad jur ïa ka sorkar bad khamtam ïa ka tnad pulit ba ki dei ban trei shitom bad thwet tyngeh haduh ban da lap ïa kine ki runar kiba leh ïa kane ka kam bad ban pynshitom ruh da kaba tyngeh.
“Ka jingshah thombor jong i kadei kaba ym ju jia koit haka jylla jongngi kaba ki runar kin dung da u thyrnia injekshon katba i dang ïaid lynti. Na ka liang jongnga bad ka kynhun kaba ngi wan lang na ka State NPWF ngi pynrem jur shisha ïa kine ki runar kiba leh ïa kane ka kam riewkhlaw,” ong ka Kong Grace.
Ha kajuh ka por ka ong ruh ba mynta ka jingjyllei u drok ha ka jylla ka la jur bad lehse kine kiba leh ruh ki lah ban dei kiba kyrni ha kine ki jingdih. Kumta, ka ong ba naka liang ka NPWF ki kyntu jur ïa ka sorkar bad ïa ka Tnad Pulit ba ki dei ban trei borbah ban kem bad pynshitom da kaba tyngeh ïa ki runar kiba donkti ha katei ka kam.
“Ki pulit ki dei ban leh da kaba tyngeh khnang ba kum kine ki jingjïa kim dei shuh ban dang ïai jia nangne shakhmat,” ka la ong.
Ka President ka la ong ruh ba ha kine ki sngi ki la ïohi ba ki longkmie ki shah thombor ha ki rukom bapher bapher. Kumta halor kane ka bynta ka la kyntu ïa ka sorkar ba kan leh da kino kino ki lad ban tehlakam ïa kum kine ki jingjia khamtam eh haba ïadei bad ka jingshah thombor ha ki iing ki sem bad khamtam eh ki jingjia kiba ju poi haduh u pud ba don ruh kiba duh ei ïa ka jingim.
Na ka liang ka Kong Grace ka la ong ruh ba ka por ka la dei ba hap ban ïa tylli lang baroh la ka long naduh ki longkmie ki longkmie, ki khun samla, ki nongmihkhmat paidbah haduh ki seng bapher bapher ban ïa tylli lang kawei ka buit kawei ka bor ban ïa khun ïa ki kam sniew kiba sdang ban ïoh jaka ha kane ka jylla khamtam eh ha ka jingïakhun pyrshah ïa u drok.
