Nongpoh, Naitung, 12: Ban tehlakam ïa ki bar jylla kiba wan ban khaïi pateng da kaba buh ïa ki dukan bapher bapher hapoh ka sor Nongpoh khlem da don ka Trading License, ka kynhun Enforcement jong ka Khasi Hills Autonomous District Council (KHADC) mynta ka sngi ki la pynlong ïa ka jingkhynra trading license ban khang lad ïa kito ki dukan jong ki bar jylla kiba pynïaid ïa ki kam khaïi khlem da don kata ka Trading License.
Kum ban pynpaw, ka sor Nongpoh ka dei kawei na ka jaka khaïi pateng ba la kham paw ha Ri Bhoi bad kaba dei ruh ka head quarter jong ka Ri Bhoi District bad kane ka jingmih kane ka kynhun Enforcement ban pynlong ïa ka jingkhynra trading license ka dei ruh hadien ba la don ka jingujor na ka liang ka Khasi Students Union, Nongpoh Circle sha u Executive Member ba dei peit ïa ka Trade bad Enforcement jong ka KHADC.
Ïa kane ka jingkhynra ïa ki Trading License da ka kynhun Enforcement ka KHADC la lamkhmat da u Inspector, u Bah V. Bamon ha kaba mynta ka sngi ki la lah ban khynra ïa bun tylli ki dukan jong jong ki bar jylla ba hap hapoh ka sor Nongpoh.
Kumba la pynpaw da kane ka kynhun Enforcement ka KHADC, ha kane ka sngi ba la sdang ban khynra ïa ki Trading License ïa ki dukan bar jylla, la lap ba bun ki dukan jong ki bar jylla kim don satia ïa ka Trading License bad ki la shu pynïaid beaiñ bad na ka liang kane ka kynhun ka la phah syndon da ka ‘showcase notice’ sha ki trai jong kine ki dukan.
Shuh shuh, ki la pyntip ruh katba ka jingkhynra ïa ki trading license ka dang ïaid shaphrang la don ruh ki dukan jong ki bar jylla kiba la khang khyrdep noh ïa ki dukan khnang ban lait na ka jingshah khynra ïa ki dukan. Kawei ruh nak aba ki la lap hapdeng ka jingkhynra ïa ki trading license la lap ruh ba la don ki dukan jong ki bar jylla kiba la wan kam da ki trai muluk trai jaka ban kam ba ka dei ka dukan jongki, katna ïa ka kam pat la pynïaid da ki bar jylla.
