Khynra trading bad labour license ka NHP ha ki Hotel bad Dhaba ha Shillong By-Pass
Lap ba bun ki dukan bym don kot don sla
Nongpoh, Lber 23: Ka seng National Hynniewtrep People (NHP) sengkmie mynta ka sngi kila hiar sha ka shnong Mawkhanu ha rud surok Shillong By-Pass naka bynta ban leit khynra ïaki kot ki sla naki dukan Hotel bad Dhaba namar ka jingdon ki nongtrei bar jylla ha katei ka jaka.
Ka seng hapoh ka jingïalam u Samla David Mawlong kum u President ryngkat bad u Bah Kharlesbon Nongbri Organising Secretary ha katei ka jingleit khynra jong ki kila lap ba bun naki bar jylla kiba trei ha katei ka jaka bad kumjuh ruh ka dhaba ki dei ki bym don ïaki kot ki sla ba biang la ka long ka Trading License lane labour License.
Ha katei ka jingleit khynra jong ka seng, kala khang syndon ruh kawei ka dhaba kaba don ha katei ka jaka kaba khlem don satia ki kot ki sla ba biang watla ka seng kala dep ban maham lypa ha shuwa ban leit khynra ba ki dei ban pynbiang ïaki jingdonkam bad ki kot ki sla khamtam ki bar jylla bad ai por biang sa kumba 10 sngi ba kin pynbiang lym kumta ka seng kala byrngem ban khang syndon ïa katei ka dukan.
Haba kren sha ki lad pathai khubor mynta ka sngi u Samla David Mawlong u la ong ba kum ka seng ka dap da ka jingsngewkhia kaba jur halor ka jingroi ki bar jylla ha kylleng ki jaka khlem ka jingpynshisha ki wan na ei bad ki leh aiu bad haba ki trei ha kano kano ka jaka kim don satia ki kot ki sla ba biang ban pynshisha ba ki wan trei bylla.
U la ong ruh ba kum ka seng kam lah ban pdiang ïaka jingleh mon jong ki bar jylla bad wat ki khasi kiba buh nongtrei da ki bar jylla ki dei ban shimkhia ban pynbiang ïaki kot ki sla kumba ka seng kala lap ruh ha katei ka sngi ba kawei ka dukan kaba la long trai da u khasi bad buh pat ki nongtrei bar jylla kiba bym biang ïaki kot ki sla, kaba lah pat ban wanrah ïaki kam sniew namar ba ym tip thikna ïaka jingwan rung jong ki sha ka jylla.
Namar kata naka liang ka seng kala maham ruh ia kiwei kiwei khamtam ki khasi kiba buh nongtrei da ki bar jylla ba kin pynbiang ïaki kot ki sla ban lait na kano kano ka huri hura hadien habud.