Nongpoh, Nailur, 21: Ka Federation of Khasi Jaiñtia and Garo People, Bhoirymbong Circle ha ka jingïalam u Samla Boy Kurbah ryngkat ka jingsynran lang ki dkhot ka North Khasi Hills District bad ka Umroi Unit hynnin ka sngi Saitjaiñ ki la leit ban khynra naphang ïa ki dukan jong ki bar jylla, ki karkhana bad kumjuh ruh ki jaka trei bapher bapher namar ka jingïoh jingtip jong ka jingjyllei ki bar jylla kiba wan trei ha katei ka jaka.
Ha katei ka jingkhynra la lap ba bun naki bar jylla kim don satia ïa ki kot ki sla kiba biang naduh ki trading license, ki labour license, bad kiwei kiwei.
U President ka seng u samla Boy Kurbah u la ong ba katei ka jingkhynra ka dei namar ka jingjyllei jong ki bar jylla kiba wan trei bylla ha katei ka thaiñ bad kum ka seng ka dap da ka jingsngewkhia ba wat ki kontraktor kiba wanrah ïa ki nongtrei kim pynbiang satia ïa ki kot ki sla jong ki nongtrei bar jylla.
Ka seng ka la maham ruh ïa ki briew kiba wanrah nongtrei nabar jylla khamtam ki kontraktor ba ki dei ban shimkhia ban pynbiang ïa ki kot ki sla jong ki nongtrei shuwa ba kin wan ban trei bylla lym kumta na ka liang ka seng lada lap kan sa shim da ki lad ba tyngeh.
