Khynra Labour License ka FKJGP ha Pahamsyiem, 1 taïew ai por ïa ki bar jylla bym biang kot biang sla

Nongpoh, Nohprah 07: Ban tehlakam ïa ki bar jylla ba wan trei bylla beaiñ hapoh ka Shnong Pahamsyiem khlem da biang ki kot ki sla kaba lah ruh ban buh jingma ïa ka shnong ka thaw, ka Federation of Khasi Jaintia & Garo People FKJGP Pahamsyiem Unit mynta ak sngi ka la pynlong ïa ka jingkhynra Labour License ïa ki bar jylla kiba wan trei bylla beain ha kiba bun ki kam trei bylla hapoh ka Shnong Pahamsyiem, Ri Bhoi District.
Haba leit ban khynra ïa ki Labour License ïa ki bar jylla, la ïalam da u Samla Banbuddien Suting kum u President bad la ïa don ryngkat ruh u Samla Bornky Mawphlang, Secretary, Jeffrey Lyngdoh, Vice President, Samla Pyntngen Nongshli, Assistant Secretary ha ryngkat kiwei kiwei ki dkhot ka seng.
Haba kren sha ki lad Pathai khubor, U Samla Banbuddien Suting, President FKJGP Pahamsyiem Unit, u la ong ba kane ka jingleit ban khynra ïaki Labour License ka long ban pynshisha ba kitei ki bar jylla kiba wan trei bylla ki la ïaid neem katkum ki kyndon aiñ haba ki wan trei bylla sha kane ka Shnong kum ki bar jylla kiba wan na kiwei ki jylla.
U la ong ruh ba ka seng ka la shim ïa kane ka sienjam ka dei hadien ba ka la ioh jingtip ba bun ki bar jylla ki la wan rung mon ban bsuh khlieh ha ki kam trei bylla khlem kano kano ka jingteh jingkhum bad dei halor kane ka nongrim ka seng ka la pynlong ïa kane ka jingkhynra Labour License bad kaba sngewsih ka long ba ha kane ka jingkhynra Labour License bun na kitei ki bar jylla kim don satia wat ïa ka Labour License.
Shuh shuh, u la bynrap ruh da kaba ong, halor kane ka jingbym biang kot biang sla kitei ki bar jylla, ka seng ka la ai por shitaiew ïa kito ki bar jylla ki bym lah ban pynbiang ïaki kot ba kin wanrah ïaki kot ki sla ki ba biang bad lada kim lah ban pynbiang ïa ki kot ki sla ka seng kan sa shim da kiwei pat ki sienjam kiba tyngeh pyrshah ïa kine ki bar jylla kiba wan trei bylla beaiñ sha kane ka jylla jongngi, u la bynrap.