Shillong, Naitung 08: Lai tylli ki tnat sorkar kum ka Shillong Municipal Board hapoh ka jingïalam jong u Assistant License officer u Bah Pynrope, ka tnat Labour bad ka Food safety, ha ka jingdonlang ka seng FKJGP Central body ryngkat ka jingsynran ki bor magistrate, ki bor pulit jong East Khasi Hills district bad ka Laitumkhrah police station ha ka sngi nyngkong ki la hiar ban khynra ïa ki kot ki sla jong ki nongbuh dukan bad ki nongtrei bar jylla ha ki bynta jong ka thaiñ Polo ter ter shaduh Demseiñïong.
Katba na ka liang ka tnat Labour ka la talasi ïa ki kot ki sla jong ki bar jylla, kiba trei ha ki dukan bapher bapher katba ka tnat Food and Safety ka la leit peit ïa ka khuid ka suba jong ki dukan kiba dei ki dukan bam, bad ha kane ka jingjurip la lap ba don katto katne ki dukan sha Dairy ki bym leh khuid nalor ba kim don ïa ka Labour Licence na ka food safety bad Labour kumta ki la phah khang noh ïa kitei ki dukan.
Ha kane ka jingkhynra dukan na ka liang ka tnat Municipal ka la lap ruh ba bun ki dukan kim biang satia ïa ki kot ki sla, bad na ka liang jong ka Municipal ka la phah khang noh ïa ki bad bthah ruh ïa ki ban wan mih hapoh shitaïew sha Municipal bad lada kim lah wan na ka Liang ka Municipal kan shim ïa ki jingpynsaja kiba long long katkum ki kyndon aiñ.
Shuh shuh na ka Liang jong u Chief Organising secretary jong ka FKJGP u Bah Khrawkupar Nongsiej u la ong ba na ka por sha ka por ka seng ka ju khynra ïa ki kot ki sla jong ki bar jylla bad kumta ka seng ka la kyntu ruh ïa ka Municipal ba dei ban shimkhia katkum ki kyndon jong ka aiñ khamtam kito ki dukan kiba pynkhieñ aiñ.
