Nongpoh, Naitung, 14: Hadien ka jinglap ba bun naki dukan bar jylla kiba seng dukan haka thaiñ Nongpoh kim don ïaki kot ki sla kiba biang, ki pulit Enforcement jong ka KHADC mynta ka sngi kila bteng biang ban khynra ïaki dukan bar jylla kiba don haka thaiñ Nongpoh bad ha kane ka jingkhynra ïaki kot ki sla, ki pulit Enforcement ki la ïoh ban pyndep ïaka jingkhynra ïaki dukan kiba dang sah bad ki la ïoh ruh ban ïaid sha baroh ki dukan kiba don ha sor nongpoh bad ki dukan kiba don markhap bad ka Nongpoh.
Ha kane ka jing khynra ha sien ba ar ïaki kot ki sla jong ki nongshong dukan la lap biang sa lai tylli ki dukan ba dei trai da ki bar jylla kim shem la don ïaka Trading Licence bad ïaki kot ki sla kiba biang kiba la shu shong beaiñ haka thaiñ Nongpoh.
Na ka liang ki pulit Enforcement hadien ka jinglap ïaki dukan ki bym lah ban pynbiang bad pynshisha ïaki kot ki sla kila phah ruh ban khang khyrdep shisyndon bad ai por hapoh 10 sngi ïa kitei ki bar jylla ba ki dei ban wan mih sha ophis ban ai jubab halor ka jingbym lah jong ki ban pynbiang ïaki kot ki sla.
Kum ban shu kdew hangne ba katei ka jingleit khynra jong ki pulit Enforcement ka dei ruh hadien ka jingleit ai jingthoh jong ka KSU sha ka District Council, hynrei naka liang ka KSU kam shym hun ïa katei ka jingkhynra ba kum ki nongïalam bad ki dkhot kim hun satia bad katei ka jingleit khynra kam shym la don kano kano ka jingpyntip sha ki dkhot ka seng.
