Nongpoh, Lber 20: Namar ka jingbun ki bar jylla kiba wan trei bylla sha kane ka jylla khlem ki kot ki sla kiba biang naduh ki Labour License, ka FKJGP Umsning Circle mynta ka sngi ka la khynra naphang ïa ki jaka ba don ki bar jylla haka thaiñ Umsning bad lap ruh ba bun na ki kim don satia ïa ki kot ki sla ba biang.
Ka seng hapoh ka jingïalam jong u Samla Gabriel Sun, President Umsning Circle, samla Shembiangpor Makri Vice President, Samla Steve Wahlang General Secretary, ryngkat bad ki dkhot kila sdang ïa ka jingkhynra ha kylleng ka thaiñ Umsning khamtam ki jaka die ïa ki mar jot naduh ka thaiñ Sumer ter ter haduh Umsning, bad pynphai iing noh ïa kiba khlem kot khlem sla katba kim pat lah ban pynbiang ïa ki kot ki sla.
Na ka liang ka seng lyngba u Samla Gabriel Sun ka la phah ruh ka kyrwoh kaba shai sha baroh ki khasi kiba khot trei ïa ki bar jylla ba ki dei ban pynbiang shuwa ïa ki kot ki sla jong ki nongtrei bar jylla shuwa ba kin wan trei sha kane ka jylla, ym ban ap haduh ban da leit ban khynra da ka seng. Hakajuh ka por na ka liang ka seng ka pynrem jur ïa ki khasi kiba leh benami namar bun ki dei kiba shu pynshah kyrteng katba ki kam la pynïaid da ki bar jylla, kumta ka seng ka maham nangne shakhmat ban kan dang peitngor bad ban nym ailad ïa kiba pyrshang ban aimon ïa ki bar jylla.
