Jowai, Ïoïong 12: Ka Jaiñtia Student Union (JSU) Syndai Unit hapoh ka jingïalam u President samla Pynshailang Suliang, u General Secretary samla Heiplanmiki Tariang, u Education Secretary samla Mario Syndai ryngkat katto katne ngut ki members hynnin ka sngi ki la khynra kot khynra sla ïa ki bar jylla kiba wan die tiar hapoh ka shnong Syndai.
Hadien ba ka seng ka lap ba kim don ki kot ki sla ki ba biang mardor ka seng kala beh krat ïa ki. Kaba sngew phylla ka long, hadien ba la pan ïa ki kot ki sla napdeng kita ki bar jylla ki la pyni pynban da ka ID Card School haka jaka ka Labour License, kane ka la pynbitar shuh shuh ïa ka seng namar ka jingbym kheiñ snep shuh ki bar jylla ïa ka aiñ ka kanun jong ka sorkar bad ka District Council.
Ka seng ka lah maham tyneh ia ki briew ka thaiñ hapoh ka thaiñ ba kim dei satia ban leh benami bad kumjuh ïa kino kino ki bar jylla ki ba wan shim kabu da kaba wan trei ne buhai shnong hapoh ka bri u hynñiewtrep namar ka pynduh mynsiem ïa ki samla trai ri trai muluk ha ka pyrthei kyrduh kam kyrduh jam bad lada lap ïa kum kita ka seng kan leh ïa kaba don kam.
