Nongstoiñ, Nailar 16 : Ka HYC West Khasi Hills District lyngba ka Nongtrai Circle ha ka jingïalam u samla Blaster Sohmad President bad samla Spailin Wanniang General Secretary, ki la ïoh ban khynra ïa ki kot ki sla jong ki bar jylla kiba wan ban trei beaiñ ha ki sawmill ha ka thaiñ Jynru Niangbrak.
Ha kane jingkhynra jong ka seng la lap ba bun ki nongtrei bar jylla kim don ïa ki kot ki sla kiba biang, kumta na ka liang ka seng ka la beh mardor ïa ki.
U President ka HYC samla Blaster Sohmad, u la ong, “Ka jingma ka ap ïa ka jaidbynriew na kine ki bar jylla, namar ngi ïohi lyngba ki lad pathai khubor ba ki don haduh 150 phew tylli ki longïing kiba la shah kyndang na ka sorkar Assam”.
“Ngi hap ban long kiba peitngor ïoh ba kine ki bar jylla kin wan rung bad buhai shnong sha kane ka jaka bad ka ri baieid jong ngi. Nangne shakhmat ngin ïai khynra bad buddien na ka por sha ka por. Ngin ïai bteng ban khynra bar jylla ha ka thaiñ ban ïada na ka jingshah tyllep ha ki bar jylla”, u la ong.
