Khyllem lut ki jingtei bad ki lum ki wah Ha kine ki khyndiat sngi ba la dep, ngi ïohsngew bad ïohi ïa kiba bun ki jingjulor jong ki jingtei ka PWD kum ki jingkieng kiba la shu hiar shapoh namar ka jingbym biang ka rukom tei. Haba phai pat ha kylleng ka sor Shillong ngi ïohi bun bah ki ïing paki- dulan (mansion) kiba long trai da ki politishan, ki engineer ka PWD/PHE (naduh ka kyrdan Assistant Engineer), ki ophisar sorkar bad kito kiba pyntrei kontrak hapoh ka sorkar jylla. Kine ki ïing pat ki skhem bha ka nongrim. Shisien pyrkhat la dei ban sngew lyngngoh naei ba kitei ki briew ki ïoh spah kyndit kyndit ban tei ïing paki-dulan.
Ha ka jylla Meghalaya, ki riewlum Khasi, Jaintia bad Garo ki lait na ka jingshah siew khajna (Income Tax) bad namar kane ka daw ym don satia ki dulir kiba biang ban kdew shai ïa ka jingïoh jingem jong ki. Ha kiwei pat ki jylla, ka tnad trei kam Income Tax ka lum khajna na ka tulop jong kito baroh kiba trei kam sorkar ne ha ki kam private ruh. Kane ka pisa ka leit sha ki kam pynroi (development). Ki nongtrei baroh ki hap ban batai shai kaei kaba ki thied na ka por sha ka por naei ki ïoh pisa ban thied jaka, ban tei ïing, ne ban thied kali etc. Dei na kane ka daw ba ha kiwei pat ki jylla ka ri India ki don ki ophisar IAS bad IPS (tnad pulit) kiba ju shah kem na ka por sha ka por ba ki bamsap. Ha ka jylla Meghalaya pat haduh mynta ym pat don uwei ruh u politishan/minister ne u/ka engineer ne u/ka ophisar ne pulit kiba lah shah kem ne shah pynshitom na ka bynta ka jingbam-sap. Kane baroh ka jia long namar mangi ki paidbah ngi long kiba ïaishah slem bad kiba sngap mynthi haba ngi ïohi ïa ka jingbamsap kaba la wanrah ïa kane ka jylla sha tmier ki riat.
Lada ngim shim khia ïa kine ki jingjia kawei hadien kawei ngin long kumba tih hi ïa la ka jong ka jingtep. Ha kane ka jingtep ngin tep lut ïa ki jingkyrmen bad ki jingthrang jong ngi ban long ka jylla kaba ïaid shaphrang ha ki liang baroh. Hato ngi ju kylli mo balei ba ngi ïoh ïa ki nongsynshar bad ki nongtrei sorkar kiba bam klop haduh katne? Hato kito kiba la ïaid ha shuwa jongngi bad kiba la trei doh-iap doh-im ban pynïoh ïa kane ka jylla ba laitluid ïa kaba ngi lah ban synshar hi, kin sngew kumno halor kane ka jinghiar dor ka synshar khadar?
Naduh u snem 1972 haduh 2018 ngi jied nongmihkhat man la ka san snem, hynrei hato ngi ïoh ne em ban kheit ïa uta u soh jong ka jingjied jongngi? Ngi jied ïa kiba kum kino ki nongthaw aiñ? Hato ki dei ki briew kiba sngewthuh ïa ka kamram jong ki? Ne ngi jied pynban da ki kontraktor ne ki nongkhaïi (businessmen) suda kiba ka jingthmu jong ki ka long beit ban nang pynheh pynïar bad pynïohnong ïa ka business jong ki? Mynta ngi ïohi tyngkreiñ ïa ka jingma kaba mih haba ngi jied ïa ki nongkhaïi ban long ki nongthaw aiñ.
Ka jingkhyllem uta u ‘dome’ lane u kynja mot ba pyllun ïa uba la pynieng ha ka jingtei jong ka ïing dorbar thaw-aiñ kaba thymmai ha Mawdiang-diang ha ka step synñia Sngi U Blei, ka kdew shai kdar ym tang ïa ka jingtrei torti ïa ka jingtei jong katei ka ïing dorbar thaw-aiñ hynrei lada tih jylliew yn lap ruh ïa ka jingbam sap kaba shyrkhei bha. Hynrei lada ki paidbah kim dawa ban tih bad wad ïa ka daw jong kane ka jingpynlehraiñ ïa ka jylla kane kan sa shu kut ha ki jingai daw da u engineer Ransom Sutnga uban sa ïeng kum u kyrtong ka seng NPP na ka Shillong North (Mawkhar) constituency.
Ka jingkylli ka mih ruh ba balei ki engineer bad ki ophisar ki kwah ban ïa kynthih ha ka lympung elekshon ynda haba ki lah shongthait? Baroh baroh ki ong ba ki ïaleh elekshon ban shakri paidbah. Hynrei mar sien dep ka elekshon pat ki lah kylla ki nongsynshar bad mangi ki paidbah pat ngi kylla pynban ki shakri kiba shu ap-thap ban ïoh bai skul khun, ne bai dawai, ne bai thied symbai ban rep.
Mynta lei lei namar ba la jan ka elekshon lah mih ki skim har rukom kiba ai lad ïa kito kiba ha ka sorkar ban sam pisa sha ki paidbah. Kawei na kita ka long ka skim FOCUS na ka ophis u Chief Minister ha kaba ka sorkar ka sam 5000 tyngka ïa man la u/ka nongrep. Ka jingthmu jong kane ka skim ka long ba ki nongrep kin pynlong ïa ka kynhun treilang (Farmer Producers’ Group). Hynrei mano ban ïalam lynti ban pynlong kam ïa kata? Hato 5000 tyngka lah biang ban thied ïa ki nongrep?
Dang ha kine ki khyndiat sngi, haba kdew ba ka jingkieng kaba ha bypass na Mawiong sha Mawlai ka lah hiar hadien ba slap jur, u Deputy Chief Minister, Bah Prestone Tynsong u ai daw hana ba ka um barabor ka pyntlor ïa ki jingtei. Hato ïa ki engineer jongngi ym shym la hikai kumno ban ïada ïa ki surok bad ki jingkieng na ka jingpynjulor ka um? Ka degree aiu keiñ ki wanrah ynda haba lah dep pule haba ngi ïohi bun ki surok kiba tang ka nala ruh ym don? Bunsien ngi ïohi ba ym tang ka um slap hynrei wat ka um nala na ïing ki briew ruh ka tuid lut sha surok. Kumno kin neh ki surok lada ka um slap ka tuid lut hapdeng surok?
Hato mangi kum ki nongthep vote bad nongjied ïa ki nongthaw-aiñ (bad ïa ka sorkar) ngim lah dei ban kylli balei ba ka shim por haduh 21 snem ban ïoh pat ïa ka ïing dorbar thaw-aiñ hadien ba la klang ka ding ïa kato kaba rim ha Khyndai-lad? Don mo kawei pat ka jylla ha kaba yn shim por haduh katne ban thaw bujli ïa ka ïing dorbar thaw-aiñ? Kaei ka daw jong kane ka jingjlan ban ïoh ïa ka ïing kaba dei ka dohnud jong ka jingsynshar paidbah (heart of democracy)?. Baroh ka dei na ka daw ba ki don barabor ki katto katne hapoh ka sorkar kiba thap beit ïa ka myntoi shimet. Te haduh katno keiñ ngi ki paidbah ngin ïaishah ïa kane?
Hato ngim lah dei ban rai ban wanrah jingkylla ha u 2023? Ka por ka lah poi ba mangi ki paidbah ngin kit khlieh bad saiñdur hi ïa la ka jong ka lawei. Lada bakla sa ha u 2023 te lah kut syndon ka lawei ki khun ki ksiew jongngi.
