Shillong, Naitung 14 : Ka madan Third Ground, Polo ha ka sngi Palei ka la dap smam da ki paidbah nongwanpeitkai ha ka jingïalehkai hapdeng ka Mawlai SC pyrshah ïa ka Ryntih SC ha ka lympung OC Blue Shillong Premier League 2021-22.
Hapdeng ka jingïakhun kaba ïakhaid bha hapdeng kitei ki ar tylli ki team kaba dei ruh ka jingïalehkai ‘Derby’, ka Mawlai SC ka la ïoh ban thep kol ha ka kylla miet lyngba u Pynbha Suting, ha kaba ki nongkyrshan ka Mawlai ki la kynhoi bad shakmen.
Hapdeng ka jingkynhoi bad kynthih ha ki lyntang (Ply wood) ba la siang, kynsan kynsan katei ka Gallery ba la shan tang da ki siej ka la khyllem noh ha kaba uwei u rangbah briew u la mynsaw bad ba la pynkit noh mar mar ïa u sha jaka ai jingsumar.
U Mawphor haba ïakren bad u Bah SS Rapthap General Secretary ka SSA u la ïathuh ba ka jingkhyllem jong katei ka Gallery ba la shna tang shipor kadei namar ka jingbun briew bad ruh ba ki paidbah nongpeitkai ki kynthih hajrong ki lyntang.
“Ngi la sngewthuh lypa ba kane ka jingïalehkai kan bun briew bha bad ngi la shna ïa ki jaka shong kat ban biang ban shong ki briew tang ban ngiam 200 ngut eiei hynrei ngi khlem poi pyrkhat ba kan khyllem hynrei donbok ba kam don kano kano ka jingjia ba sngewsih lait noh tang uwei ba mynsaw malu mala,” ong u Bah Rapthap.
U la ïathuh ba man ki jingïalehkai ki gallery ki dap beit smam hynrei ha kane ka sngi ka la tam arshah. “Man ka sngi ki jaka shong ki dap beit smam hynrei mynta ka sngi ka la tam arshah. Ngin sa shong pyrkhat shwa la ngin bteng lane ban weng noh ïa ki jaka shong. Ngi la shu shna tang shipor ban suk ki paidbah bad ngim lah ruh ban khang ïa ki paidbah hynrei ngin sa shim ka rai kaba biang tam na bynta ki paidbah riew ieit football,” la ong u Bah Rapthap.
Ha kane ka jingïalehkai ka Mawlai SC ka la khur jingjop da kaba pynliem da 5-0 ïa ka Ryntih SC.
