Nongpoh, Ïaiong 27: Ka rynsan bala pynkhreh pynkhrum bad pynitynnad bha naka bynta ban pynlong ïaka jingïaseng General Assembly jong ka Presbyterian Church of India kaba 44 kala khyllem noh hynnin ka miet naka jingkhyrwit jong ka eriong kaba jur haka thaiñ Umroi.
Kum ban shu pynpaw ba katei ka jingïaseng kan sdang naduh mynta ka sngi bad pynkut haka sngi u Blei hynrei kala wanrah ka jingthud ïaka jingpynlong ïaka jingïaseng namar ka jingpra jong ka rynsan kaba la kyllon beit ha madan watla ki nongwan jingïaseng kila poi ha katei ka thaiñ.
Halor katei ka jingpra jong katei ka rynsan naka bynta ban pynlong ïaka jingïaseng PCI Assembly naka liang ka Dorbar Shnong jong ka Umroi Umdohbyrthih, Umroi Madan, Umroi Laban saro,Umroi Jaiawpdeng bad Umroi Nongrah hapoh ka jingkdup jong ka Dorbar Umroi Pyllun kila ioh ban lum ïa baroh ki kynhun balang ha ryngkat ka jingïa don lang u MLA Bah George Lyngdoh, ha kaba naka liang ki kynhun balang bapher bapher kila pynpaw ka jingsngewlem halor katei ka jingjia bym poi pyrkhat.
Shuh shuh naka liang ki kynhun balang pher bapher ha katei ka thaiñ naduh ka Balang Catholic, Balang u Khrist bad Balang Presbyterian kila rai ban ïatreilang bad ban pynieng biang ïa katei ka rynsan naduh lashai ka sngi haka jingïatreilang bad ki dorbar Shnong ha katei ka thaiñ khnang ba katei ka jingïaseng kan long kaba ïaid beit ïaid ryntih.
