Paris, Nailur 23 : Ki arngut ki rangïalehkai ba pawnam ha ka pyrthei u Lamine Yamal ka Barcelona bad u Vitinha ka Paris Saint-German ki la don hakhmat eh ka jingïakhun hynrei ha kaba khatduh dei u rangïalehkai shakhmat ka PSG u Ousmnae Dembele uba ïoh ban rah ïa ka khusnam Ballon d’Or na ka liang ki shynrang ha ka lympung sam khusnam jong ka Théâtre du Châtelet kaba long ha Paris ha ka miet sngi Nyngkong.
Une u rangïalehkai u la shah jied ruh ban khur ïa ka khusnam UEFA Champions League Player of the Season hadien ba ka Paris ka la ïoh ban khur ïa ka nam lahduh ha ka sien kaba nyngkong.
Ha kajuh ka por u Mohammed Salah jong ka Liverpool u la dei uwei na ki rangïalehkai ka English Premier League ba wan hakhmat eh ha kane ka lympung da kaba wan ha ka kyrdan ba saw jong ka Ballon d’Or ranking list.
Lada phai tang ha ka Tip 10 jong kane ka thup ki rangïalehkai ba wan shakhmat ha ka Ballon d’Or haduh 5 ngut ki dei na ka PSG, ka kynhun kaba la rah ïa ka Champions League nalor ba ka don ha lynti ban jop ia ka Ligue 1.
Nalor u Dembele bad u Vitinha, kiwei pat ki rangïalehkai kiba paw kyrteng ki kynthup ïa u Achraf Hakimi, Gianluigi Donnarumma bad ruh u Nuno Mendes kiba don lang ha ka Top 10.
Nalor u Lamal bad Salah, kiwei pat ki nongïalehkai ki bym dei na ka PSG ki kynthup ïa u Raphinha ka Barcelona, u Kylian Mbappe ka Real Madrid bad u Cole Palmer ka Chelsea.
Haba kren halor kane ka sngi u Dembele u la ong, “Ngam don ktien shuh ban ong ei ei. Ka la dei ka samoi kaba sngewtynnad tam bad ka PSG,” ong u Dembele hadien ba u la ïoh ban khur ïa kane ka khusnam Ballon d’Or. Nangta u ong ruh ba watla ka dei ka khusnam shimet hynrei ka dei pat ka khusnam kaba u ïoh da ka jingïatreilang.
Ha ka liang ki kynthei pat ïa ka khusnam Ballon d’Or la ïoh da ka Aitana Bonmatí ka thei ïalehkai jong ka ri Spain bad ïalehkai na ka klob Barcelona.
Kiwei pat ki khusnam ba sam ha kane ka sngi ki kynthup ïa ka khusnam –
Men’s Kopa Trophy: Lamine Yamal (Spain, Barcelona)
Women’s Kopa Trophy: Vicky López (Spain, Barcelona)
Men’s Yashin Trophy: Gianluigi Donnarumma (Italy, Paris Saint-Germain)
Women’s Yashin Trophy: Hannah Hampton (England, Chelsea).
Men’s Gerd Müller Trophy: Viktor Gyökeres (Sweden, Sporting CP/Arsenal)
Women’s Gerd Müller Trophy: Ewa Pajor (Poland, Barcelona)
Men’s Johan Cruyff Trophy: Luis Enrique (Spain, Paris Saint-Germain)
Women’s Johan Cruyff Trophy: Sarina Wiegman (Netherlands, England national team)
Men’s Club of the Year Trophy: Paris Saint-Germain (France)
Women’s Club of the Year Trophy: Arsenal (England)
Sócrates Award: Fundación Xana (Spain).
