SHILLONG, Rymphang 16: Ar ngut ki samla ïalehkai jong ka jylla Meghalaya ba kynthup ïa u Rishanskhem P Lipon bad u Damangpura L Mawlong ki la ïoh ban khur takma rnong ha ka 6th Khun Khmer World Championship 2026 kaba la long ha Shanoukville, Cambodia.
Baroh arngut ki la mihkhmat ïa ka India hapoh ka lama jong ka KIF Kun Khmer Federation of India, hapoh ka jingïalam jong u Vengatachalam Sarona Mahalingam Bad u State Chief Thomas Rangthaluh Umling Nongpoh Ribhoi District.
Kane ka Championship ka la sdang ha ka 10 tarik Rymphang bad ka la kut ha ka 13 tarik Rymphang, 2026, ha kaba palat 10 tylli ki ri ki la wan ïashim bynta. Kane ka lympung ka kynthup ïa ka jingïalehkai kyrdan amateur bad kumjuh ruh ha ka Professional Bout.
U samla Rishanskhem P Lipon, ba shong ba sah ha Nongmynsong Umkdait bad uba dang pule ha St Anthony Higher Secondary School Laitumkhrah, Shillong, u la ïoh ban khur ïa ka takma rnong ha ka kyrdan ïakhun kaba 57-kg Semi Pro jong ki shynrang ba la kham rangbah (Senior Men). Katba u Damangpura L Mawlong na Mairang, u la jop takma rnong ha ka kyrdan ïakhun kaba 60-kg Amatuer Senior Men.
