Shillong, Naitung 08 : Na ki 9 ngut ki nongïalehkai kiba leit ban aireng ha ka 24th National Junior Wushu Championship kaba dang shu kut shen ha Rajeev Gandhi Chowbowli Indoor Stadium , Telengana, tang uwei u khynnah Class XI uba ïoh ban khur takma na katei ka lympung.
Une u khynnah ba ïoh ban khur takma rnong u dei ba tip kyrteng kum u Bansahnam Nongbet uba leit skul ha St. Francis Higher Secondary School Smit, East Khasi Hills.
Na ka liang ka Meghalaya Wushu Association lyngba ka kyrwoh na General Secretary, Jerry Fiscal Wankhar ka pynpaw ka jingkmen halor kane ka jingjop bad jingïoh khur takma jong u. Ha kajuh ka por ka ai pat ka jingkitbok ïa baroh kiba leit shim bynta ha kane ka lympung kampher watla ki khlem ïoh khur takma.
Ka Synjuk ka ong ruh ba kane ka jingleit ïakhun ka long ruh kum ka jingpynkhreh na ka bynta ka National Games kaba 39 kaban sa long ha Meghalaya ha u snem 2027.
